لیہ (نمائندہ لیہ ٹی وی )فلور ملز ایسوسی ایشن ضلع لیہ کے سال2026ء تا 2028ء کے لیے نئے عہدیداران کا انتخاب مکمل کر لیا گیا۔ انتخابی عمل کے بعد چاند خان فلور ملز کے سیٹھ محمد رضوان اسلم خان کو بلا مقابلہ صدر جبکہ پائینئر فلور ملز کے ملک نزیر احمد کو جنرل سیکرٹری منتخب کر لیا گیا۔
اسی طرح شان فلور ملز کے محمد شوکت سینئر نائب صدر اور صغیر فلور ملز کے چوہدری افضل نائب صدر منتخب ہوئے۔ نو منتخب عہدیداران کو فلور ملز مالکان نے مبارکباد دیتے ہوئے امید ظاہر کی کہ وہ ایسوسی ایشن کے مفادات کے تحفظ کے لیے مؤثر کردار ادا کریں گے۔
اس موقع پر نومنتخب صدر سیٹھ محمد رضوان اسلم خان نے اپنے خطاب میں کہا کہ فلور ملز ایسوسی ایشن، فلور ملز مالکان، ضلعی انتظامیہ اور محکمہ خوراک کے درمیان مؤثر رابطے اور اعتماد کی فضا قائم کرنے کے لیے پل کا کردار ادا کرے گی۔ انہوں نے کہا کہ فلور ملز مالکان کے خلاف کسی بھی قسم کے ناجائز اور غیر قانونی اقدامات کی بھرپور مزاحمت کی جائے گی اور محکمہ خوراک میں موجود بدعنوان عناصر کے خلاف قانونی اور جمہوری انداز میں متحد ہو کر جدوجہد کی جائے گی۔
انہوں نے مزید کہا کہ فلور ملز مالکان کے خلاف درج کی جانے والی غیر قانونی ایف آئی آرز کے خلاف ہر قانونی فورم پر بھرپور دفاع کیا جائے گا۔ ان کا کہنا تھا کہ عوام کو معیاری، خالص اور حفظانِ صحت کے اصولوں کے مطابق آٹے کی فراہمی ایسوسی ایشن کی اولین ترجیح ہوگی اور پنجاب حکومت کی جانب سے جاری کردہ تمام ایس او پیز پر مکمل عمل درآمد کو یقینی بنایا جائے گا۔
نومنتخب عہدیداران نے اس عزم کا اظہار کیا کہ وہ فلور ملز انڈسٹری کو درپیش مسائل کے حل، مالکان کے جائز حقوق کے تحفظ اور عوام کو معیاری آٹے کی بلا تعطل فراہمی کے لیے مشترکہ حکمت عملی کے تحت کام کریں گے۔
