پی ٹی آئی کا 5 اگست کو لیہ میں احتجاج کا اعلان، عمران خان کی گرفتاری کے تین سال مکمل ہونے پر ریلی نکالنے کا فیصلہ

لیہ (نمائندہ لیہ ٹی وی) پاکستان تحریکِ انصاف (پی ٹی آئی) نے بانی چیئرمین عمران خان کی گرفتاری کے تین سال مکمل ہونے پر 5 اگست بروز بدھ شام 5 بجے سٹی ریلوے پھاٹک لیہ کے قریب احتجاجی مظاہرے کا اعلان کر دیا ہے۔پارٹی قیادت کی جانب سے جاری اعلامیے کے مطابق احتجاجی مظاہرے کی قیادت سابق صوبائی وزیر ایم پی اے سردار شہاب الدین خان سیہڑ، ایم این اے ملک اویس نیاز جھکڑ، ایم پی اے چوہدری اطہر مقبول، ایم پی اے شعیب امیر اعوان، ایم پی اے اسامہ اصغر گجر، سابق ایم این اے عبدالمجید خان نیازی سمیت دیگر سینئر رہنما کریں گے۔پی ٹی آئی رہنماؤں نے کارکنوں، عہدیداران اور حامیوں سے اپیل کی ہے کہ وہ مقررہ وقت پر سٹی ریلوے پھاٹک پہنچ کر احتجاجی مظاہرے میں بھرپور شرکت کریں۔ اعلامیے کے مطابق احتجاج کا مقصد پارٹی کے سیاسی مؤقف کو عوام کے سامنے پیش کرنا، عمران خان کی مسلسل قید کے خلاف آواز بلند کرنا اور موجودہ سیاسی صورتحال پر اپنا احتجاج ریکارڈ کرانا ہے۔پی ٹی آئی کے رہنماؤں نے اپنے بیان میں مؤقف اختیار کیا کہ بانی چیئرمین عمران خان کی گرفتاری کو تین سال مکمل ہو چکے ہیں، تاہم انہیں اب بھی اپنی جماعت کے ڈاکٹروں، وکلاء اور منتخب پارلیمنٹرینز سے ملاقات کی اجازت نہیں دی جا رہی۔ رہنماؤں نے مطالبہ کیا کہ عمران خان کو قانون کے مطابق تمام بنیادی اور آئینی حقوق فراہم کیے جائیں اور ملاقاتوں پر عائد پابندیاں ختم کی جائیں۔پارٹی قیادت نے کارکنوں کو ہدایت کی کہ احتجاج مکمل طور پر پرامن، منظم اور نظم و ضبط کے ساتھ کیا جائے اور قانون کی پاسداری کو یقینی بنایا جائے۔