لیہ (نمائندہ لیہ ٹی وی)ریسکیو 1122 ضلع لیہ نے ماہ جولائی 2026 کے دوران نمایاں کارکردگی کا مظاہرہ کرتے ہوئے مجموعی طور پر 5 ہزار 461 ایمرجنسی کالز پر بروقت رسپانس دیا اور 5 ہزار 355 متاثرین کو ریسکیو اور طبی امداد فراہم کی۔ اس دوران 2 ہزار 342 مریضوں کو ہسپتال منتقل کیا گیا جبکہ 2 ہزار 161 افراد کو موقع پر ابتدائی طبی امداد فراہم کی گئی۔یہ اعداد و شمار ڈسٹرکٹ ایمرجنسی آفیسر ڈاکٹر سجاد احمد ملک کی زیر صدارت منعقدہ ماہانہ کارکردگی جائزہ اجلاس میں پیش کیے گئے، جہاں ضلع بھر میں فراہم کی جانے والی ایمرجنسی سروسز، رسپانس ٹائم اور آپریشنل امور کا تفصیلی جائزہ لیا گیا۔اجلاس کو بریفنگ دیتے ہوئے بتایا گیا کہ یکم جولائی سے 31 جولائی 2026 کے دوران 3 ہزار 440 میڈیکل ایمرجنسیز، 529 روڈ ٹریفک حادثات، 72 کرائم ایمرجنسیز، 97 گرنے کے واقعات، 11 آتشزدگی، 6 ڈوبنے کے واقعات، ایک عمارت گرنے کا واقعہ، 771 پیشنٹ ٹرانسفر سروسز اور 426 دیگر متفرق ایمرجنسیز پر ریسکیو ٹیموں نے کامیاب کارروائیاں انجام دیں۔رپورٹ کے مطابق مختلف حادثات میں81 افراد موقع پر جاں بحق ہوئے جبکہ 108 افراد کو مردہ حالت میں ریسکیو کیا گیا۔اجلاس سے خطاب کرتے ہوئے ڈسٹرکٹ ایمرجنسی آفیسر ڈاکٹر سجاد احمد ملک نے ریسکیو اہلکاروں کی پیشہ ورانہ صلاحیتوں، بروقت رسپانس اور عوامی خدمت کے جذبے کو سراہتے ہوئے کہا کہ ریسکیو 1122 کا بنیادی مقصد شہریوں کی جان و مال کا تحفظ اور ہر ایمرجنسی میں فوری، مؤثر اور معیاری خدمات کی فراہمی ہے۔ انہوں نے افسران اور اہلکاروں کو ہدایت کی کہ سروس کے معیار، رسپانس ٹائم اور پیشہ ورانہ کارکردگی کو مزید بہتر بنانے کے لیے اپنی کوششیں جاری رکھیں تاکہ عوام کو ہر ممکن بہترین ایمرجنسی سہولیات فراہم کی جا سکیں۔
