اسلام آباد: فیڈرل بورڈ آف ریونیو (ایف بی آر) کے ماتحت ادارے پاکستان سنگل ونڈو (پی ایس ڈبلیو) نے سرحد پار تجارت کو مزید آسان، تیز اور شفاف بنانے کے لیے پہلی بار موبائل ایپ لانچ کر دی۔
پاکستان سنگل ونڈو کے مطابق نئی موبائل ایپ کے ذریعے درآمد کنندگان، برآمد کنندگان اور کسٹم کلیئرنگ ایجنٹس اپنی تجارتی سرگرمیوں کی نگرانی موبائل فون کے ذریعے کر سکیں گے۔
پی ایس ڈبلیو حکام کا کہنا ہے کہ ایپ کے ذریعے درآمدی اور برآمدی ڈیکلیئریشنز کی مانیٹرنگ، کسٹم کلیئرنس کی رئیل ٹائم اپڈیٹس اور ریگولیٹری تقاضوں سے متعلق سہولیات فراہم کی جائیں گی۔
موبائل ایپ میں مختلف سرٹیفکیٹس تک آن لائن رسائی، صوبائی سیس اور بینک گارنٹی ریلیز کی درخواست جمع کرانے کی سہولت بھی شامل کی گئی ہے۔
اس کے علاوہ صارفین کو پیمنٹ سلپ آئی ڈی، پیمنٹ مینجمنٹ سسٹم اور کسٹمر سپورٹ کی سہولیات بھی دستیاب ہوں گی تاکہ تجارت سے متعلق امور کو مزید مؤثر انداز میں مکمل کیا جا سکے۔
پاکستان سنگل ونڈو کے مطابق اس اقدام کا مقصد ملکی تجارت کے نظام کو جدید ڈیجیٹل تقاضوں سے ہم آہنگ کرنا، کاروباری آسانیوں میں اضافہ کرنا اور درآمد و برآمد کے عمل کو زیادہ شفاف بنانا ہے۔
