اسلام آباد: وزیراعظم محمد شہباز شریف نے پیٹرولیم مصنوعات کی قیمتوں کے تعین کے طریقہ کار اور ایل این جی کارگوز کی خریداری سے متعلق اہم اجلاس آج طلب کر لیا ہے۔ اجلاس میں وفاقی وزراء، متعلقہ سیکریٹریز اور توانائی شعبے کے اعلیٰ حکام شرکت کریں گے۔
ذرائع کے مطابق اجلاس میں خطے کی موجودہ صورتحال، توانائی کی ضروریات اور حکومت کی پالیسیوں کا تفصیلی جائزہ لیا جائے گا۔ اجلاس کے دوران پیٹرولیم مصنوعات کی قیمتوں کے موجودہ طریقہ کار، قیمتوں کے تعین کے نظام اور ممکنہ تبدیلیوں پر غور کیا جائے گا۔
ذرائع کا کہنا ہے کہ وزیراعظم محمد شہباز شریف پیٹرولیم پرائس میکنزم سے متعلق اہم ہدایات جاری کر سکتے ہیں تاکہ عوام اور ملکی معیشت کے مفاد میں مؤثر حکمت عملی اپنائی جا سکے۔
اجلاس میں ایل این جی کارگوز کی خریداری، دستیابی اور مستقبل کی ضروریات پر بھی تبادلہ خیال کیا جائے گا۔ ذرائع کے مطابق خطے میں جاری غیر یقینی صورتحال اور سپلائی چین کے مسائل کے باعث پاکستان کو اسپاٹ مارکیٹ سے ایل این جی خریدنے پر انحصار کرنا پڑ رہا ہے۔
ذرائع کے مطابق قطر سے ایل این جی سپلائی میں تعطل کے باعث پاکستان کو مہنگے اسپاٹ کارگوز خریدنا پڑے، جبکہ جولائی کے لیے پاکستان پانچ ایل این جی کارگوز پہلے ہی خرید چکا ہے۔
اجلاس میں توانائی کی مسلسل فراہمی، درآمدی اخراجات میں کمی اور مستقبل کی ضروریات کے لیے جامع حکمت عملی مرتب کرنے سے متعلق تجاویز کا بھی جائزہ لیا جائے گا۔
