لاہور: پاکستان کرکٹ ٹیم آئندہ سال 2027 میں پانچ ایک روزہ بین الاقوامی میچوں کی سیریز کھیلنے کے لیے انگلینڈ کا دورہ کرے گی۔ دونوں ٹیموں کے درمیان یہ سیریز آئی سی سی مینز کرکٹ ورلڈکپ 2027 کی تیاریوں کے سلسلے میں اہم قرار دی جا رہی ہے۔
شیڈول کے مطابق پاکستان اور انگلینڈ کے درمیان پانچ ون ڈے میچز 15 سے 26 مئی 2027 تک کھیلے جائیں گے۔ سیریز کا پہلا میچ 15 مئی کو ساؤتھمپٹن، دوسرا 19 مئی کو مانچسٹر، تیسرا 21 مئی کو لیڈز، چوتھا 23 مئی کو چیسٹر لی اسٹریٹ جبکہ پانچواں اور آخری ون ڈے 26 مئی کو کارڈف میں ہوگا۔
پاکستان کرکٹ ٹیم کا یہ دورہ ورلڈکپ 2027 کی تیاریوں کے لیے انتہائی اہم ہوگا، جس میں قومی ٹیم انگلینڈ کی کنڈیشنز میں اپنی کارکردگی بہتر بنانے کا موقع حاصل کرے گی۔
آئی سی سی مینز کرکٹ ورلڈکپ 2027 جنوبی افریقہ، زمبابوے اور نمیبیا میں 4 اکتوبر سے 21 نومبر تک کھیلا جائے گا۔
آئی سی سی ون ڈے ٹیم رینکنگ میں پاکستان پانچویں جبکہ انگلینڈ ساتویں نمبر پر موجود ہے۔ قومی ٹیم نے آخری مرتبہ 2021 میں انگلینڈ کا دورہ کیا تھا، جہاں تین ون ڈے میچز کی سیریز کھیلی گئی تھی۔
