لیہ (نمائندہ لیہ ٹی وی) پل مائی جیون، جمن شاہ کے قریب دریائے لالہ کریک میں 40 سالہ خاتون کے ڈوبنے کا خدشہ ظاہر کیا گیا ہے، جس کے بعد ریسکیو 1122 نے فوری طور پر سرچ آپریشن شروع کر دیا۔ریسکیو 1122 کے مطابق لاپتہ خاتون کی شناخت حاجرہ بی بی زوجہ ریاض حسین، عمر تقریباً 40 سال، کے نام سے ہوئی ہے۔ اہلِ خانہ نے بتایا کہ خاتون صبح تقریباً 4 بجے سے لاپتہ تھی۔ بعد ازاں دریائے کنارے ان کے جوتے ملنے پر خدشہ ظاہر کیا گیا کہ وہ پانی میں ڈوب گئی ہیں۔اطلاع موصول ہوتے ہی ریسکیو 1122 کی ایمبولینس موقع پر پہنچ گئی، جبکہ واٹر ریسکیو ٹیم کشتیاں اور ضروری آلات کے ہمراہ جائے وقوعہ پر پہنچ کر سرچ آپریشن میں مصروف ہو گئی۔ ریسکیو حکام کے مطابق 7 اہلکاروں پر مشتمل واٹر ریسکیو ٹیم خاتون کی تلاش جاری رکھے ہوئے ہے۔ریسکیو 1122 کا کہنا ہے کہ دریائے لالہ کریک میں پانی کی گہرائی تقریباً 20 فٹ ہے جبکہ پانی کا بہاؤ بھی تیز ہے، جس کے باعث ریسکیو کارروائی احتیاط سے جاری رکھی جا رہی ہے۔ڈسٹرکٹ ایمرجنسی آفیسر ڈاکٹر سجاد احمد ملک کی نگرانی میں سرچ آپریشن بلا تعطل جاری ہے۔ ریسکیو حکام کا کہنا ہے کہ خاتون کی تلاش کے لیے تمام دستیاب وسائل بروئے کار لائے جا رہے ہیں۔
