ڈسٹرکٹ ہیلتھ کونسل کا اجلاس، ڈی ایچ کیو ہسپتال لیہ میں طبی سہولیات بہتر بنانے کے اقدامات پر غور

لیہ(نمائندہ لیہ ٹی وی) ایڈیشنل ڈپٹی کمشنر جنرل شبیر احمد ڈوگر کی زیر صدارت ڈسٹرکٹ ہیلتھ کونسل کا اجلاس منعقد ہوا، جس میں ڈی ایچ کیو ہسپتال لیہ کے انتظامی، طبی اور مالی امور کا تفصیلی جائزہ لیا گیا۔اجلاس میں ادویات اور طبی سامان کی خریداری، ڈائیلاسز سروسز کے لیے ضروری اشیاء کی فراہمی، طبی آلات و مشینری کی مرمت، یو پی ایس اور برقی نظام کی بحالی، ایئر کنڈیشنرز کی خریداری، ہسپتال کی عمارت کی مرمت و تزئین، صفائی ستھرائی اور دیگر ترقیاتی امور زیر بحث آئے۔ایڈیشنل ڈپٹی کمشنر جنرل شبیر احمد ڈوگر نے ہدایت کی کہ مریضوں کو معیاری طبی سہولیات کی فراہمی یقینی بنائی جائے اور منظور شدہ منصوبوں کو مقررہ مدت میں مکمل کیا جائے۔ اجلاس میں پیش کی گئی سفارشات کو بعد ازاں ڈپٹی کمشنر لیہ آصف علی ڈوگر نے منظور کر لیا۔