لاہور (نمائندہ خصوصی) پنجاب بھر میں ایل پی جی کی قیمتوں میں نمایاں اضافہ دیکھنے میں آ رہا ہے، جس کے باعث گھریلو صارفین شدید مشکلات کا شکار ہیں۔ مارکیٹ ذرائع کے مطابق حکومت کی جانب سے ایل پی جی کی سرکاری قیمت 308 روپے فی کلو مقرر کی گئی ہے، تاہم لاہور سمیت مختلف شہروں میں دکاندار ایل پی جی 480 سے 500 روپے فی کلو تک فروخت کر رہے ہیں۔ذرائع کا کہنا ہے کہ بعض دکاندار اپنی مرضی سے روزانہ 10 سے 20 روپے فی کلو تک قیمت میں اضافہ کر دیتے ہیں، جس کے باعث صارفین کو اضافی مالی بوجھ برداشت کرنا پڑ رہا ہے۔ شہریوں نے متعلقہ حکام سے مطالبہ کیا ہے کہ ایل پی جی کی مقررہ سرکاری قیمت پر فروخت کو یقینی بنایا جائے اور منافع خور عناصر کے خلاف سخت کارروائی کی جائے۔صارفین کا کہنا ہے کہ مہنگائی کے موجودہ دور میں ایل پی جی کی قیمتوں میں بے قابو اضافہ گھریلو بجٹ کو مزید متاثر کر رہا ہے، جبکہ متعلقہ اداروں کی جانب سے مؤثر نگرانی نہ ہونے کے باعث دکاندار من مانی قیمتیں وصول کر رہے ہیں۔
