لَیّہ (نمائندہ لیہ ٹی وی) ایڈیشنل ڈپٹی کمشنر جنرل و منیجنگ ڈائریکٹر ستھرا پنجاب شبیر احمد ڈوگر نے محرم الحرام کے انتظامات کے سلسلے میں شیخ ظفر والی گلی کا دورہ کیا اور صفائی ستھرائی، سبیل پوائنٹس اور ویسٹ مینجمنٹ ٹیموں کی کارکردگی کا تفصیلی جائزہ لیا۔اس موقع پر انہوں نے متعلقہ افسران اور عملے کو ہدایت کی کہ جلوسوں اور مجالس کے راستوں پر صفائی کا اعلیٰ معیار ہر صورت برقرار رکھا جائے، سبیل پوائنٹس کے اطراف خصوصی صفائی یقینی بنائی جائے اور کوڑا کرکٹ کی بروقت تلفی کے لیے ویسٹ مینجمنٹ ٹیمیں مسلسل متحرک رہیں تاکہ عزاداروں کو صاف ستھرا اور بہتر ماحول میسر آ سکے۔بعد ازاں اے ڈی سی جی شبیر احمد ڈوگر نے دربار عارف شہید کا دورہ کیا جہاں انہوں نے محرم الحرام کے انتظامات، صفائی ستھرائی اور عوامی سہولیات کا معائنہ کیا۔ انہوں نے متعلقہ اداروں کو ہدایت کی کہ تمام انتظامات مؤثر انداز میں برقرار رکھے جائیں اور عزاداروں کو ہر ممکن سہولت فراہم کی جائے۔اس موقع پر شبیر احمد ڈوگر نے کہا کہ ڈپٹی کمشنر لَیّہ آصف علی ڈوگر کی ہدایات کے مطابق محرم الحرام کے دوران صفائی ستھرائی، عوامی سہولیات اور امن و امان کے قیام کے لیے تمام ادارے باہمی ہم آہنگی کے ساتھ متحرک ہیں۔انہوں نے کہا کہ ضلعی انتظامیہ کی اولین ترجیح عزاداروں کو محفوظ، پرامن اور صاف ستھرا ماحول فراہم کرنا ہے اور اس مقصد کے لیے تمام دستیاب وسائل بروئے کار لائے جا رہے ہیں۔
