ملک بھر میں 9 محرم الحرام کے جلوس برآمد، سکیورٹی کے سخت انتظامات، لاکھوں عزادار شریک کراچی، لاہور، اسلام آباد سمیت مختلف شہروں میں مرکزی جلوس روایتی راستوں پر رواں دواں، پولیس، رینجرز اور قانون نافذ کرنے والے ادارے ہائی الرٹ

اسلام آباد/کراچی/لاہور/لیہ (مانیٹرنگ ڈیسک)ملک بھر کے چھوٹے بڑے شہروں میں 9 محرم الحرام کے مرکزی جلوس اپنے روایتی راستوں پر برآمد ہو گئے ہیں، جبکہ عزاداروں کی بڑی تعداد شہدائے کربلا کو خراجِ عقیدت پیش کرنے کے لیے جلوسوں میں شریک ہے۔کراچی میں 9 محرم الحرام کا مرکزی جلوس نشتر پارک سے برآمد ہوا جو اپنے مقررہ اور روایتی راستوں پر رواں دواں ہے۔ ٹریفک پولیس کے مطابق جلوس کے باعث ایم اے جناح روڈ کو ٹریفک کے لیے بند کر دیا گیا ہے جبکہ شہریوں کے لیے متبادل راستوں کا انتظام کیا گیا ہے۔لاہور میں امام بارگاہ قصرِ بتول شادمان سے نکلنے والا شبیہہ ذوالجناح کا مرکزی جلوس اپنے روایتی راستوں پر گامزن ہے۔ جلوس میں عزاداروں کی بڑی تعداد شریک ہے جبکہ سکیورٹی کے سخت انتظامات کیے گئے ہیں۔وفاقی دارالحکومت اسلام آباد میں بھی 9 محرم الحرام کے مرکزی جلوس کے لیے غیر معمولی سکیورٹی انتظامات کیے گئے ہیں۔ آئی جی اسلام آباد سید علی ناصر رضوی نے سکیورٹی انتظامات کا جائزہ لیتے ہوئے بتایا کہ جلوسوں اور مجالس کی حفاظت کے لیے تقریباً 16 ہزار اہلکار تعینات کیے گئے ہیں۔انہوں نے کہا کہ پولیس، رینجرز اور پاک فوج کے جوان سکیورٹی فرائض سرانجام دے رہے ہیں جبکہ پانچ سطحی سکیورٹی حصار قائم کیا گیا ہے۔ جلوس کے راستوں پر کنٹرول رومز فعال ہیں اور حساس مقامات کی مسلسل نگرانی کی جا رہی ہے۔لیہ میں محرم الحرام جلوس ذوالجناح آستانہ شہید محمد عارف سے برآمد ہوکرتحصیل روڈ سے ہوتا ہوا ڈاکٹر سید قیصر عباس رضوی مرحوم کے مکان کے آگے سے گذرتا ہو ا صدر بازار سے ہوتا ہوا شمالی دروازہ عبور کرکے امام خانہ حسینیہ میں داخل ہوگا مرثیہ خوانی سیدعلی اسد اللہ رضوی کریں گے ،ڈی پی او حسن جاوید بھٹی نے سیکورٹی انتظامات کا جائزہ لیتے ہوئے بتایا کہ ضلع پولیس اور ضلعی انتظامیہ ضلع بھر میں نکلنے والے جلوسوں کی فول پروف سیکورٹی کے ساتھ ساتھ راستوں کی صفائی ستھرائی اور پانی،شربت اور دودھ کی سبیلیں بھی لگائی ہوئی ہیں ملک بھر میں محرم الحرام کے موقع پر امن و امان برقرار رکھنے کے لیے قانون نافذ کرنے والے ادارے ہائی الرٹ ہیں اور جلوسوں و مجالس کی نگرانی کا عمل جاری ہے۔