لَیّہ(نمائندہ لَیّہ ٹی وی) ڈپٹی کمشنر لَیّہ آصف علی ڈوگر اور ڈسٹرکٹ پولیس آفیسر حسن جاوید بھٹی کی زیر قیادت محرم الحرام کے سلسلے میں فلیگ مارچ کا انعقاد کیا گیا۔ فلیگ مارچ سپورٹس کمپلیکس سے شروع ہو کر کشمیر چوک، لَیّہ مائنر، اسلم موڑ، کوٹلہ حاجی شاہ اور کھر چوک تک نکالا گیا۔فلیگ مارچ میں ضلعی انتظامیہ، پولیس، ریسکیو 1122، سول ڈیفنس، پیرا فورس اور دیگر قانون نافذ کرنے والے اداروں کے افسران و اہلکاروں نے شرکت کی۔ فلیگ مارچ کا مقصد شہریوں میں احساسِ تحفظ کو فروغ دینا، بین المسالک ہم آہنگی کو مضبوط بنانا اور محرم الحرام کے دوران امن و امان کے قیام کے لیے اداروں کے عزم کا اظہار کرنا تھا۔اس موقع پر ڈپٹی کمشنر آصف علی ڈوگر نے کہا کہ محرم الحرام ہمیں امن، برداشت، بھائی چارے اور اتحاد کا درس دیتا ہے۔ فلیگ مارچ کا مقصد شہریوں میں اعتماد پیدا کرنا اور یہ واضح پیغام دینا ہے کہ ضلعی انتظامیہ اور تمام متعلقہ ادارے عوام کے جان و مال کے تحفظ اور امن و امان کے قیام کے لیے مکمل طور پر متحرک ہیں۔انہوں نے کہا کہ ضلع بھر میں امن و امان کی فضا قائم ہے اور اس پرامن ماحول کو برقرار رکھنے کے لیے تمام دستیاب وسائل بروئے کار لائے جا رہے ہیں۔ علما کرام، امن کمیٹیوں، انجمنوں اور شہریوں کے تعاون سے باہمی احترام، رواداری اور مذہبی ہم آہنگی کی فضا مزید مضبوط ہوگی۔ڈپٹی کمشنر نے مزید کہا کہ مجالس اور جلوسوں کے پرامن انعقاد کو یقینی بنانا ضلعی انتظامیہ کی اولین ترجیح ہے اور تمام متعلقہ محکمے باہمی رابطے اور مربوط حکمت عملی کے تحت اپنی ذمہ داریاں ادا کر رہے ہیں۔ڈسٹرکٹ پولیس آفیسر حسن جاوید بھٹی نے کہا کہ محرم الحرام کے دوران سکیورٹی کے جامع اور مؤثر انتظامات کیے گئے ہیں۔ جلوسوں اور مجالس کی مسلسل نگرانی کی جا رہی ہے جبکہ حساس مقامات پر پولیس کی اضافی نفری بھی تعینات کی گئی ہے۔انہوں نے کہا کہ پولیس فورس شہریوں کے تحفظ اور امن و امان کے قیام کے لیے ہر وقت تیار ہے اور کسی بھی ناخوشگوار واقعے کی روک تھام کے لیے تمام ضروری اقدامات کیے جا رہے ہیں۔ انہوں نے شہریوں سے اپیل کی کہ وہ ضلعی انتظامیہ اور پولیس کے ساتھ تعاون کریں اور کسی بھی مشکوک سرگرمی کی فوری اطلاع متعلقہ اداروں کو دیں۔فلیگ مارچ کے اختتام پر شرکاء نے محرم الحرام کے دوران امن، بھائی چارے، مذہبی ہم آہنگی اور قانون کی بالادستی کے فروغ کے عزم کا اعادہ کیا۔
