لَیّہ(نمائندہ لَیّہ ٹی وی) ایڈیشنل ڈپٹی کمشنر جنرل لَیّہ شبیر احمد ڈوگر نے محرم الحرام کے دوران امن و امان کے قیام اور انتظامات کی مؤثر نگرانی کے لیے قائم مرکزی کنٹرول روم، ڈی سی آفس لَیّہ کا دورہ کیا اور وہاں موجود انتظامات کا تفصیلی جائزہ لیا۔دورے کے دوران انہوں نے کنٹرول روم میں نصب مانیٹرنگ سسٹم، مواصلاتی سہولیات، رپورٹنگ کے طریقہ کار اور مختلف محکموں کی جانب سے فراہم کی جانے والی معلومات کا معائنہ کیا جبکہ کنٹرول روم کے انتظامی امور کے حوالے سے بریفنگ بھی حاصل کی۔اس موقع پر ایڈیشنل ڈپٹی کمشنر جنرل شبیر احمد ڈوگر نے کنٹرول روم میں تعینات افسران اور اہلکاروں کو ہدایت کی کہ محرم الحرام کے دوران تمام متعلقہ محکموں کے ساتھ مؤثر رابطہ برقرار رکھا جائے اور موصول ہونے والی ہر اطلاع یا شکایت پر فوری اور مؤثر کارروائی کو یقینی بنایا جائے۔انہوں نے کہا کہ بین المحکمانہ رابطہ کاری، بروقت معلومات کے تبادلے اور مسلسل نگرانی کے ذریعے مجالس اور جلوسوں کے پرامن انعقاد کو یقینی بنایا جا رہا ہے۔ ان کا کہنا تھا کہ ڈپٹی کمشنر لَیّہ آصف علی ڈوگر کی ہدایات کے مطابق محرم الحرام کے سلسلے میں تمام انتظامات مکمل اور فعال ہیں جبکہ مرکزی کنٹرول روم چوبیس گھنٹے کام کر رہا ہے۔شبیر احمد ڈوگر نے مزید بتایا کہ مختلف محکموں کے نمائندگان مسلسل صورتحال کی نگرانی کر رہے ہیں اور کسی بھی ہنگامی صورتحال سے نمٹنے کے لیے تمام ضروری انتظامات موجود ہیں۔انہوں نے کہا کہ ضلعی انتظامیہ، پولیس اور دیگر متعلقہ ادارے باہمی تعاون اور ہم آہنگی کے ساتھ فرائض سرانجام دے رہے ہیں جبکہ ضلع بھر میں امن، رواداری اور مذہبی ہم آہنگی کی فضا برقرار رکھنے کے لیے مؤثر اقدامات جاری ہیں تاکہ شہریوں کو محفوظ اور پرامن ماحول فراہم کیا جا سکے۔
