لَیّہ (نمائندہ لَیّہ ٹی وی) ایڈیشنل ڈپٹی کمشنر جنرل و منیجنگ ڈائریکٹر ستھرا پنجاب شبیر احمد ڈوگر نے محرم الحرام کے سلسلے میں جلوس روٹس اور مجالس کے اطراف انتظامات کا تفصیلی معائنہ کیا۔ اس موقع پر انہوں نے صفائی ستھرائی، سکیورٹی اور دیگر انتظامی امور کا جائزہ لیا جبکہ ستھرا پنجاب کی فیلڈ ٹیموں کی موجودگی، کارکردگی اور جلوس روٹس پر جاری صفائی کے انتظامات کو بھی چیک کیا۔ایڈیشنل ڈپٹی کمشنر جنرل نے مختلف مقامات کا دورہ کرتے ہوئے متعلقہ افسران اور عملے کو ہدایت کی کہ جلوسوں اور مجالس کے راستوں پر صفائی ستھرائی کے اعلیٰ معیار کو ہر صورت برقرار رکھا جائے۔ انہوں نے کہا کہ تمام سڑکوں، گلیوں اور عوامی مقامات سے کوڑا کرکٹ بروقت اٹھایا جائے اور راستوں کو ہر قسم کی رکاوٹ سے پاک رکھا جائے تاکہ عزاداران کو کسی قسم کی دشواری کا سامنا نہ کرنا پڑے۔شبیر احمد ڈوگر نے کہا کہ ڈپٹی کمشنر لَیّہ آصف علی ڈوگر کی ہدایات کے مطابق محرم الحرام کے دوران صفائی ستھرائی کے خصوصی انتظامات کیے گئے ہیں اور ستھرا پنجاب کی ٹیمیں فیلڈ میں متحرک رہتے ہوئے اپنی ذمہ داریاں احسن انداز میں سرانجام دے رہی ہیں۔انہوں نے مزید ہدایت کی کہ صفائی کے معیار پر کوئی سمجھوتہ نہ کیا جائے اور جلوس روٹس و مجالس کے اطراف ماحول کو صاف، ستھرا اور خوشگوار رکھا جائے۔ ان کا کہنا تھا کہ ضلعی انتظامیہ کی اولین ترجیح امن و امان کے قیام کے ساتھ عزاداران کو بہترین سہولیات کی فراہمی ہے، جس کے لیے تمام متعلقہ ادارے باہمی ہم آہنگی کے ساتھ فرائض انجام دے رہے ہیں۔ایڈیشنل ڈپٹی کمشنر جنرل نے اس عزم کا اظہار کیا کہ محرم الحرام کے دوران صفائی ستھرائی اور دیگر انتظامی امور کی مسلسل نگرانی جاری رکھی جائے گی تاکہ عزاداران کو پرامن اور سہولتوں سے بھرپور ماحول فراہم کیا جا سکے۔
