چوبارہ میں چار سال سے قائم ناجائز قبضہ ختم، سرکاری بازار واگزار کروا لیا گیا ڈپٹی کمشنر لَیّہ کی ہدایت پر انتظامیہ کی کارروائی، سرکاری اراضی قبضہ مافیا سے خالی کرا کے متعلقہ محکمہ کے حوالے

لَیّہ (نمائندہ لَیّہ ٹی وی) ڈپٹی کمشنر لَیّہ آصف علی ڈوگر کی ہدایت پر سرکاری املاک سے ناجائز قبضہ واگزار کروانے کے لیے مؤثر کارروائی کرتے ہوئے چک نمبر 376 ٹی ڈی اے میں واقع سرکاری بازار کو قبضہ مافیا سے خالی کروا لیا گیا۔اسسٹنٹ کمشنر چوبارہ ذوالفقار صابر نے انفورسمنٹ آفیسر پیرا فورس شوکت حیات کے ہمراہ آپریشن کی نگرانی کی۔ کارروائی کے دوران چار سال سے غیر قانونی قابضین کے زیر استعمال سرکاری بازار کو واگزار کروا کر متعلقہ محکمہ کے حوالے کر دیا گیا۔اس موقع پر اسسٹنٹ کمشنر ذوالفقار صابر نے کہا کہ سرکاری اراضی اور املاک پر کسی بھی قسم کا غیر قانونی قبضہ برداشت نہیں کیا جائے گا۔ انہوں نے واضح کیا کہ قبضہ مافیا کے خلاف بلا امتیاز کارروائیاں جاری رہیں گی اور سرکاری وسائل کے تحفظ کے لیے تمام قانونی اقدامات بروئے کار لائے جائیں گے۔انہوں نے مزید کہا کہ عوامی مفاد کے تحفظ، سرکاری زمینوں کی بازیابی اور قانون کی عملداری کو یقینی بنانا ضلعی انتظامیہ کی اولین ترجیحات میں شامل ہے۔