فیفا فٹبال ورلڈ کپ کے ایک اہم میچ میں پرتگال نے ازبکستان کو یکطرفہ مقابلے کے بعد 5-0 سے شکست دے دی۔ میچ میں پرتگال کے کپتان کرسٹیانو رونالڈو نے شاندار کارکردگی کا مظاہرہ کرتے ہوئے دو گول اسکور کیے اور فٹبال کی تاریخ میں ایک نیا ریکارڈ اپنے نام کر لیا۔
رونالڈو نے میچ کا پہلا گول چھٹے منٹ میں جبکہ دوسرا گول 39 ویں منٹ میں اسکور کیا، جس کے بعد وہ فیفا ورلڈ کپ کی تاریخ میں چھ مختلف ایڈیشنز میں گول کرنے والے دنیا کے پہلے فٹبالر بن گئے۔
41 سالہ کرسٹیانو رونالڈو 2006، 2010، 2014، 2018، 2022 اور 2026 کے ورلڈ کپ مقابلوں میں گول اسکور کرنے کا منفرد اعزاز حاصل کر چکے ہیں۔ اس تاریخی کارکردگی کے ساتھ وہ ورلڈ کپ کی تاریخ کے دوسرے معمر ترین گول اسکورر بھی بن گئے ہیں۔
رونالڈو کے اس ریکارڈ نے فٹبال شائقین کو ایک بار پھر ان کی غیرمعمولی صلاحیتوں اور طویل کیریئر کا معترف بنا دیا ہے، جبکہ پرتگال کی ٹیم نے بھی ایونٹ میں اپنی مضبوط موجودگی کا بھرپور اظہار کیا ہے۔
