حج 2027ء کے لیے آن لائن رجسٹریشن کا آغاز، سرکاری و نجی اسکیموں کے لیے رجسٹریشن لازمی قرار عازمین گھر بیٹھے رجسٹریشن کروا سکیں گے، ابتدائی مرحلے میں پاسپورٹ لازمی نہیں، کوئی فیس بھی وصول نہیں کی جائے گی

اسلام آباد: حج 2027ء کے لیے عازمینِ حج کی آن لائن رجسٹریشن کا باقاعدہ آغاز کر دیا گیا ہے۔ وزارتِ مذہبی امور کے مطابق خواہشمند افراد وزارت کی آفیشل ویب سائٹ کے ذریعے اپنی رجسٹریشن مکمل کر سکتے ہیں۔ترجمان وزارتِ مذہبی امور نے بتایا کہ رجسٹریشن کے ابتدائی مرحلے میں پاسپورٹ کا ہونا لازمی نہیں، تاہم حج بکنگ کے وقت پاسپورٹ لازمی درکار ہوگا۔ پاسپورٹ کی میعاد کم از کم نومبر 2027ء تک مؤثر ہونی چاہیے۔ترجمان کے مطابق صرف رجسٹرڈ افراد ہی حج 2027ء کی بکنگ کے اہل ہوں گے، جبکہ حج بکنگ ’’پہلے آئیں، پہلے پائیں‘‘ کی بنیاد پر مطلوبہ کوٹہ مکمل ہونے تک جاری رہے گی۔ حج پیکیج کے اخراجات اور دیگر شرائط کا اعلان حج پالیسی 2027ء کے تحت بعد میں کیا جائے گا۔وفاقی وزیر مذہبی امور سردار محمد یوسف نے میڈیا سے گفتگو کرتے ہوئے کہا کہ قومی آئی ٹی بورڈ کے تعاون سے حج کے عمل کو مکمل طور پر ڈیجیٹائز کیا جا رہا ہے تاکہ عازمین کو زیادہ سہولت فراہم کی جا سکے۔انہوں نے بتایا کہ بیرونِ ملک مقیم پاکستانی بھی دنیا کے کسی بھی ملک سے آن لائن رجسٹریشن کروا سکیں گے۔ وزیرِ مذہبی امور نے واضح کیا کہ حج رجسٹریشن کے لیے کسی قسم کی فیس وصول نہیں کی جائے گی۔سردار محمد یوسف نے مزید کہا کہ سرکاری اور نجی دونوں حج اسکیموں کے لیے رجسٹریشن لازمی قرار دی گئی ہے اور رجسٹریشن کے بغیر حج 2027ء کے لیے درخواست جمع نہیں کرائی جا سکے گی۔ انہوں نے بتایا کہ ایک ہی خاندان کے افراد مشترکہ طور پر بھی رجسٹریشن کروا سکیں گے۔