لیہ (نمائندہ لیہ ٹی وی) ایڈیشنل ڈپٹی کمشنر جنرل شبیر احمد ڈوگر نے محرم الحرام کے انتظامات کے سلسلے میں لیہ سٹی کے مختلف جلوس روٹس کا دورہ کیا اور صفائی ستھرائی کے انتظامات کا تفصیلی جائزہ لیا۔دورے کے دوران انہوں نے ستھرا پنجاب ٹیموں کی موجودگی، حاضری اور کارکردگی کا معائنہ کیا اور متعلقہ عملے کو ضروری ہدایات جاری کیں۔ اے ڈی سی جی نے تاکید کی کہ جلوس روٹس پر صفائی کے اعلیٰ معیار کو ہر صورت برقرار رکھا جائے تاکہ عزاداروں اور شہریوں کو صاف ستھرا اور بہتر ماحول میسر آ سکے۔شبیر احمد ڈوگر نے کہا کہ ضلعی انتظامیہ محرم الحرام کے دوران بہترین انتظامات کی فراہمی کے لیے تمام وسائل بروئے کار لا رہی ہے، جبکہ ستھرا پنجاب ایجنسی کے ورکرز بھی جذبۂ خدمت کے تحت اپنی ذمہ داریاں احسن انداز میں سرانجام دیں۔انہوں نے مزید ہدایت کی کہ تمام ورکرز دورانِ ڈیوٹی اپنے محکمانہ شناختی کارڈز نمایاں طور پر پہنیں اور فرائض کی انجام دہی میں نظم و ضبط کا خاص خیال رکھیں تاکہ عوام کو بہترین سہولیات فراہم کی جا سکیں۔اے ڈی سی جی نے اس عزم کا اظہار کیا کہ محرم الحرام کے دوران صفائی، سکیورٹی اور دیگر انتظامی امور کو مؤثر انداز میں مکمل کیا جائے گا تاکہ مجالس اور جلوسوں کے شرکاء کو کسی قسم کی دشواری کا سامنا نہ کرنا پڑے۔
