اسلام آباد: پاکستان میں تیار کی گئی فیفا ورلڈ کپ 2026ء کی جدید فٹبال ’’ٹریونڈا‘‘ نے ایک اور منفرد اعزاز حاصل کر لیا ہے اور اب یہ زمین سے نکل کر خلاء تک پہنچ گئی ہے۔
امریکی خلائی تحقیقاتی ادارے ناسا کی جانب سے سوشل میڈیا پلیٹ فارم انسٹاگرام پر جاری کی گئی ویڈیو میں بین الاقوامی خلائی اسٹیشن (آئی ایس ایس) میں موجود خلاء بازوں کو فیفا ورلڈ کپ کی جدید فٹبال کے ساتھ کھیلتے ہوئے دیکھا جا سکتا ہے۔
رپورٹ کے مطابق خلاء بازوں نے مائیکرو گریویٹی ماحول میں فٹبال کے رویے اور حرکت کا جائزہ لینے کے لیے یہ تجربہ کیا۔ اس دوران یہ جاننے کی کوشش کی گئی کہ ایڈیڈاز کی تیار کردہ جدید فٹبال خلاء میں توازن، وزن اور حرکت کے حوالے سے کس طرح ردعمل ظاہر کرتی ہے۔
ناسا کے مطابق اس تجربے کا مقصد یہ سمجھنا تھا کہ فٹبال کے وزن اور توازن میں معمولی فرق بھی اس کی حرکت اور کارکردگی پر کس حد تک اثر انداز ہو سکتا ہے۔ ادارے نے بتایا کہ اسی نوعیت کا ایک تجربہ 2019ء میں بھی کیا گیا تھا جس کے نتائج سے ثابت ہوا تھا کہ توازن میں معمولی تبدیلی بھی گیند کی حرکت کو متاثر کر سکتی ہے۔
پاکستان کے شہر سیالکوٹ میں تیار کی گئی یہ فٹبال پہلے ہی عالمی سطح پر اپنی معیاری تیاری کے باعث شہرت رکھتی ہے، جبکہ اب اس کا خلائی تجربات کا حصہ بننا پاکستانی صنعت کے لیے ایک اہم اعزاز قرار دیا جا رہا ہے۔
