لاہور میں سولر پلیٹس سستی، مختلف واٹس کی قیمتوں میں 4 سے 9 ہزار روپے تک کمی
پیٹرولیم مصنوعات کی قیمتوں میں کمی کے بعد سولر پلیٹس اور بیٹریوں کی قیمتیں مزید کم ہونے کا امکان
لاہور: سولر توانائی استعمال کرنے والے صارفین کے لیے خوشخبری سامنے آگئی ہے، جہاں مختلف واٹس کی سولر پلیٹس کی قیمتوں میں 4 ہزار سے 9 ہزار روپے تک کمی ریکارڈ کی گئی ہے۔
مارکیٹ ذرائع کے مطابق حالیہ دنوں میں پیٹرولیم مصنوعات کی قیمتوں میں کمی کے بعد سولر مارکیٹ میں بھی مثبت اثرات مرتب ہونا شروع ہو گئے ہیں، جس کے نتیجے میں سولر پلیٹس کی قیمتوں میں نمایاں کمی دیکھنے میں آئی ہے۔
ذرائع کا کہنا ہے کہ اگر پیٹرولیم مصنوعات کی قیمتوں میں استحکام برقرار رہا تو آنے والے دنوں میں سولر پلیٹس کی قیمتوں میں مزید کمی متوقع ہے، جس سے صارفین کو ریلیف ملے گا اور متبادل توانائی کے ذرائع کے استعمال کو فروغ ملے گا۔
مارکیٹ ذرائع کے مطابق پیٹرولیم مصنوعات کی بلند قیمتوں کے باعث بیٹریوں کی قیمتوں میں بھی نمایاں اضافہ ہوا تھا۔ ایک بیٹری کی قیمت میں 27 ہزار سے 38 ہزار روپے تک اضافہ ریکارڈ کیا گیا تھا، تاہم اب پیٹرولیم مصنوعات کی قیمتوں میں کمی کے بعد بیٹریوں کی قیمتیں بھی کم ہونے کا امکان ظاہر کیا جا رہا ہے۔
تاجروں کا کہنا ہے کہ سولر سسٹمز اور متعلقہ آلات کی قیمتوں میں کمی سے گھریلو، تجارتی اور زرعی صارفین کو فائدہ پہنچے گا۔
t
