لیہ(نمائندہ لیہ ٹی وی) ایڈیشنل ڈپٹی کمشنر ریونیو ڈاکٹر عابدہ فرید نے ڈسٹرکٹ ہیڈ کوارٹر ہسپتال لیہ کا دورہ کیا۔انہوں نے مختلف وارڈز، ایمرجنسی اور دیگر شعبہ جات کا معائنہ کرتے ہوئے مریضوں کو فراہم کی جانے والی طبی سہولیات، ادویات کی دستیابی اور صفائی ستھرائی کے انتظامات کا تفصیلی جائزہ لیا۔ایڈیشنل ڈپٹی کمشنر ریونیو ڈاکٹر عابدہ فرید نے زیر علاج مریضوں اور ان کے لواحقین سے ملاقات کی اور علاج معالجہ سمیت دیگر سہولیات کے بارے میں دریافت کیا۔انہوں نے ہسپتال عملہ کی حاضری بھی چیک کی اور متعلقہ افسران کو ہدایت کی کہ مریضوں کو بروقت علاج، معیاری طبی سہولیات اور ضروری ادویات کی فراہمی ہر صورت یقینی بنائی جائے۔ڈاکٹر عابدہ فرید نے کہا کہ سرکاری ہسپتالوں میں آنے والے شہریوں کو بہترین طبی خدمات کی فراہمی اولین ترجیح ہے اور اس سلسلہ میں کسی قسم کی غفلت یا کوتاہی برداشت نہیں کی جائے گی۔
