لیہ(نمائندہ لیہ ٹی وی) سوشل میڈیا پر سامنے آنے والے تھیلیسیمیا کے مریض محمد اویس کا معاملہ، ڈپٹی کمشنر آصف علی ڈوگر کا فوری ایکشن، خصوصی میڈیکل بورڈ تشکیل دے دیا گیا۔ ڈپٹی کمشنر آصف علی ڈوگر نے دکھی انسانیت کی خدمت اور عوامی مسائل کے فوری حل کی روایت برقرار رکھتے ہوئے سوشل میڈیا پر سامنے آنے والے تھیلیسیمیا کے مریض محمد اویس کے معاملے کا فوری نوٹس لے لیا، جس پر ڈسٹرکٹ ہیلتھ اتھارٹی لیہ نے اس کے تفصیلی طبی معائنے کے لیے خصوصی تین رکنی میڈیکل بورڈ تشکیل دے دیا۔ تفصیلات کے مطابق محمد اویس ولد سلیم اختر، رہائشی موضع نوشہرہ نشیب، یونین کونسل شادو خان، تحصیل و ضلع لیہ کے علاج اور صحت کی مجموعی صورتحال کا جائزہ لینے کے لیے ڈی ایچ کیو ہسپتال لیہ میں خصوصی میڈیکل بورڈ قائم کیا گیا ہے۔ میڈیکل سپرنٹنڈنٹ ڈی ایچ کیو ہسپتال لیہ کی جانب سے جاری احکامات کے تحت محمد اویس کو اپنے والدین کے ہمراہ میڈیکل بورڈ کے سامنے پیش ہونے کی ہدایت کی گئی تاکہ اس کا مکمل طبی معائنہ کیا جا سکے۔ جاری نوٹیفکیشن کے مطابق میڈیکل بورڈ مریض کی موجودہ طبی کیفیت، درکار علاج اور آئندہ لائحہ عمل کا تفصیلی جائزہ لینے کے بعد 48 گھنٹوں کے اندر اپنی سفارشات اور رپورٹ متعلقہ اعلیٰ حکام کو ارسال کرے گا۔ تشکیل دیے گئے میڈیکل بورڈ میں سینئر کنسلٹنٹ پیڈیاٹریشن ڈاکٹر ام سلمیٰ کو چیئرپرسن جبکہ کنسلٹنٹ پیڈیاٹریشن ڈاکٹر محمد آصف میرانی اور کنسلٹنٹ فزیشن ڈاکٹر عبدالعزیز کو بطور ممبران شامل کیا گیا ہے۔ میڈیکل سپرنٹنڈنٹ ڈی ایچ کیو ہسپتال لیہ نے متعلقہ اداروں کو ضروری ہدایات جاری کر دی ہیں تاکہ میڈیکل بورڈ کی کارروائی اور بعد ازاں علاج معالجے کے اقدامات بروقت مکمل کیے جا سکیں۔ واضح رہے کہ سینئر صحافی زاہد گشکوری نے سوشل میڈیا پر محمد اویس کی بیماری اور علاج سے متعلق معاملہ اجاگر کیا تھا، جس پر ڈپٹی کمشنر آصف علی ڈوگر نے فوری نوٹس لیتے ہوئے محکمہ صحت کو ضروری کارروائی کی ہدایت کی، جس کے نتیجے میں خصوصی میڈیکل بورڈ تشکیل دیا گیا۔
