لیہ میں عیدالاضحیٰ 2026 پر ریسکیو 1122 ہائی الرٹ، مساجد، عیدگاہوں، مویشی منڈیوں اور تفریحی مقامات پر خصوصی ڈیوٹیاں انجام
لیہ( نمائندہ لیہ ٹی وی) عیدالاضحیٰ 2026 کے موقع پر ریسکیو 1122 لیہ کی جانب سے ضلع بھر میں خصوصی ایمرجنسی ڈیوٹیاں سرانجام دی گئیں۔ ریسکیو ترجمان کے مطابق مساجد، امام بارگاہوں، عیدگاہوں، ریونیو پوسٹس، تفریحی مقامات اور مویشی منڈیوں پر ریسکیو اہلکاروں کو تعینات کیا گیا تاکہ کسی بھی ہنگامی صورتحال سے فوری طور پر نمٹا جا سکے۔ریسکیو 1122 کے مطابق عید نماز کے اجتماعات کے دوران ایمبولینسز، بائیک ایمبولینسز اور فائر وہیکلز سمیت ریسکیو ٹیمیں مختلف حساس مقامات پر الرٹ رہیں جبکہ شہریوں کو بروقت طبی امداد اور ایمرجنسی سہولیات کی فراہمی یقینی بنائی گئی۔ ضلع بھر میں عید نماز پرامن ماحول میں ادا کی گئی اور ریسکیو کی ایمرجنسی ڈیوٹیاں تاحال جاری ہیں۔ڈسٹرکٹ ایمرجنسی آفیسر ڈاکٹر سجاد احمد کی ہدایات پر تمام ریسکیو اسٹاف نے اپنے اہل خانہ سے دور رہ کر فرائض انجام دیے جبکہ عید کے موقع پر تمام چھٹیاں اور ڈے آف بھی منسوخ کیے گئے تھے۔ ریسکیو 1122 کی جانب سے دریاؤں اور نہری علاقوں میں قائم ریونیو پوسٹس اور مویشی منڈیوں پر خصوصی مانیٹرنگ بھی جاری رکھی گئی تاکہ کسی بھی ناخوشگوار واقعہ کی صورت میں فوری رسپانس فراہم کیا جا سکے۔اس موقع پر ڈسٹرکٹ ایمرجنسی آفیسر ڈاکٹر سجاد احمد نے ڈیوٹی پر موجود ریسکیو اہلکاروں کے ہمراہ کیک کاٹا اور عوامی خدمت کے جذبے کے تحت فرائض انجام دینے والے اہلکاروں کے حوصلے اور جذبے کو سراہا۔ انہوں نے کہا کہ ریسکیو اہلکار عید جیسے خوشیوں بھرے موقع پر بھی اپنے خاندانوں سے دور رہ کر انسانیت کی خدمت کر رہے ہیں جو قابل تحسین ہے۔ریسکیو 1122 نے شہریوں سے اپیل کی ہے کہ عید کے ایام میں احتیاطی تدابیر اختیار کریں اور کسی بھی ایمرجنسی کی صورت میں فوری طور پر 1122 پر رابطہ کریں۔