لَیّہ (نمائندہ لیہ ٹی وی) ڈپٹی کمشنر آصف علی ڈوگر نے ٹی ایچ کیو ہسپتال چوک اعظم میں ڈائیلاسز سنٹر کا افتتاح کر دیا۔ افتتاحی تقریب میں اسسٹنٹ کمشنر زوہیب کریم، سی ای او ہیلتھ ڈاکٹر شاہد ریاض، ایم ایس ڈاکٹر محمد ارشد، حاجی احسان اللہ سیال، سیاسی و سماجی شخصیت یاسر عرفات اور دیگر معززین نے شرکت کی۔ڈپٹی کمشنر آصف علی ڈوگر نے تقریب سے خطاب کرتے ہوئے کہا کہ وزیراعلیٰ پنجاب مریم نواز شریف کی ہدایات پر صحت کے شعبے میں عوام کو بہتر اور معیاری طبی سہولیات کی فراہمی کیلئے عملی اقدامات جاری ہیں۔ انہوں نے کہا کہ پنجاب حکومت شہریوں کو ان کی دہلیز پر جدید علاج معالجہ کی سہولیات فراہم کرنے کیلئے ترجیحی بنیادوں پر کام کر رہی ہے۔انہوں نے کہا کہ ٹی ایچ کیو ہسپتال چوک اعظم میں ڈائیلاسز سنٹر کے قیام سے گردوں کے امراض میں مبتلا مریضوں کو مقامی سطح پر علاج کی سہولت میسر آئے گی اور اب انہیں ڈائیلاسز کیلئے دیگر شہروں کا رخ نہیں کرنا پڑے گا۔ڈپٹی کمشنر نے مزید کہا کہ اس سنٹر کے فعال ہونے سے چوک اعظم اور گردونواح کے عوام کو گھر کے قریب بہتر طبی سہولیات دستیاب ہوں گی، جس سے مریضوں کو نہ صرف آسانی ہوگی بلکہ وقت اور اخراجات میں بھی کمی آئے گی۔
