لَیّہ (نمائندہ لیہ ٹی وی) الیکشن کمیشن آف پاکستان کی ہدایات کی روشنی میں دفتر ضلع الیکشن کمشنر لَیّہ کی جانب سے ضلع لَیّہ کی ابتدائی حلقہ بندیاں شائع کر دی گئی ہیں، جنہیں عوام کے جائزے کیلئے دفتر میں آویزاں بھی کر دیا گیا ہے۔اعلامیے کے مطابق اہلیانِ لَیّہ اپنی متعلقہ یونین کونسل کی حلقہ بندی کا جائزہ لے سکتے ہیں اور کسی بھی قسم کے اعتراض کی صورت میں دفتر ریجنل الیکشن کمشنر ڈیرہ غازی خان، واقع ڈویژنل آفس کمپلیکس ریلوے روڈ ڈیرہ غازی خان میں دفتری اوقات کے دوران 26 مئی 2026 سے 23 جون 2026 تک اپنی درخواست جمع کرا سکتے ہیں۔الیکشن حکام کے مطابق اعتراض جمع کرانے کیلئے متعلقہ یونین کونسل کے ووٹر کو اعتراضی درخواست فارم کے ساتھ 100 روپے کے عدالتی ٹکٹ چسپاں کرنا ہوں گے جبکہ کمپیوٹرائزڈ قومی شناختی کارڈ، ووٹر سرٹیفکیٹ کی نقول اور دیگر مطلوبہ دستاویزات بھی جمع کرانا ہوں گی۔اعتراض کی پانچ دستخط شدہ نقول بھی فراہم کرنا لازمی ہوں گی، جبکہ اعتراض کنندہ اپنی درخواست ذاتی طور پر یا مجاز نمائندے کے ذریعے جمع کرا سکے گا۔ اعتراض فارم میں اعتراض کی وجوہات اور مجوزہ حلقہ بندی کی تفصیلات درج کرنا ضروری ہوں گی۔اعلامیے کے مطابق مناسب طور پر نشان زدہ اور بغیر نشان والے نقشے بھی اعتراض کے ساتھ منسلک کرنا ہوں گے جن میں مردم شماری بلاکس اور مجوزہ آبادی کی تفصیلات شامل ہوں۔ یہ نقشے دفتر ضلعی الیکشن کمشنر لَیّہ، بالمقابل واپڈا آفس، آفسز کمپلیکس لَیّہ سے دفتری اوقات میں حاصل کیے جا سکتے ہیں، جس کیلئے فی نقشہ 2000 روپے فیس نیشنل بینک آف پاکستان میں جمع کرانا ہوگی۔ضلعی الیکشن کمشنر آفس نے مزید معلومات کیلئے شہریوں کو دفتر سے رابطہ کرنے کی ہدایت بھی جاری کی ہے۔
