لَیّہ(نمائندہ لیہ ٹی وی) کوئٹہ ریلوے ٹریک دھماکے میں شہید ہونے والے 24 سالہ شایان الطاف کی نمازِ جنازہ اُن کے آبائی علاقے محلہ قادر آباد میں ادا کر دی گئی، جس کے بعد انہیں فوجی اعزاز کے ساتھ سپردِ خاک کر دیا گیا۔ نمازِ جنازہ میں ضلعی انتظامیہ، پولیس، پاک فوج کے افسران، سماجی و سیاسی شخصیات، عزیز و اقارب اور شہریوں کی بڑی تعداد نے شرکت کی۔نمازِ جنازہ میں اے ڈی سی جی شبیر احمد ڈوگر، ڈی پی او لَیّہ حسن جاوید بھٹی، آرمی افسران اور دیگر حکام بھی موجود تھے۔ شرکاء نے شہید کے بلند درجات اور اہلِ خانہ کیلئے صبرِ جمیل کی دعا کی۔شہید شایان الطاف کو فوجی اعزاز کے ساتھ سپردِ خاک کیا گیا جبکہ سکیورٹی اہلکاروں نے سلامی بھی پیش کی۔ اہلِ علاقہ کا کہنا تھا کہ وطن کے تحفظ کیلئے دی جانے والی یہ قربانی ہمیشہ یاد رکھی جائے گی اور قوم اپنے بہادر سپوتوں کی قربانیوں کو کبھی فراموش نہیں کرے گی۔شہید کے اہلِ خانہ نے کہا کہ انہیں اپنے بیٹے کی قربانی پر فخر ہے اور ملک و قوم کیلئے جان قربان کرنے والے شہداء پوری قوم کا سرمایہ ہیں۔
