لَیّہ(نمائندہ لیہ ٹی وی) وزیر اعلیٰ پنجاب مریم نواز شریف کے احکامات اور ڈی جی محکمہ تحفظ ماحول عمران حامد شیخ کی ہدایات پر ضلع بھر میں ماحولیاتی آلودگی پھیلانے والوں کے خلاف کارروائیاں تیز کر دی گئی ہیں۔ اس سلسلے میں اسسٹنٹ ڈائریکٹر ماحولیات لَیّہ محمد ارشد چغتائی کی نگرانی میں گزشتہ تین روز کے دوران لَیّہ اور کروڑ کے مختلف علاقوں میں متعدد کارروائیاں عمل میں لائی گئیں۔محکمہ ماحولیات کی ٹیم نے مختلف بھٹہ جات کا معائنہ کیا جہاں زگ زیگ ٹیکنالوجی کی خلاف ورزی پر 2 بھٹہ جات کی غیر قانونی اینٹوں کی بھرائی مسمار کر دی گئی۔ اس دوران 3 سروس اسٹیشنز کا بھی معائنہ کیا گیا اور وہاں واٹر ری سائیکلنگ سسٹم کی تنصیب کو یقینی بنایا گیا۔کارروائی کے دوران ڈینگی مچھر کی افزائش کے 61 سے زائد مقامات کا معائنہ کیا گیا جبکہ ہسپتالوں کے رسک ویسٹ کی محفوظ تلفی یقینی بنانے کیلئے کباڑخانوں کو بھی چیک کیا گیا اور متعلقہ افراد کو نوٹس جاری کیے گئے۔مزید کارروائی کرتے ہوئے مختلف دکانوں سے 75 مائیکرون سے کم 20 کلوگرام سے زائد غیر قانونی پلاسٹک بیگز تحویل میں لے لیے گئے۔اس موقع پر اسسٹنٹ ڈائریکٹر ماحولیات محمد ارشد چغتائی نے کہا کہ ماحولیاتی آلودگی کے خاتمے اور انسانی صحت کے تحفظ کیلئے حکومتی احکامات پر سختی سے عملدرآمد کیا جا رہا ہے۔ انہوں نے کہا کہ غیر قانونی پلاسٹک بیگز، ماحولیاتی آلودگی اور خلاف ورزی کے مرتکب عناصر کے خلاف بلا امتیاز کارروائیاں جاری رہیں گی جبکہ شہریوں میں ماحول دوست اقدامات کے حوالے سے آگاہی بھی فراہم کی جا رہی ہے۔
