تحریر: پروفیسر ڈاکٹر مزمل حسین
جعفر بلوچ نے اپنے معروف تذکرے "آیاتِ ادب” میں لیہ کی علمی و ادبی روایت کو محض موجودہ عہد تک محدود نہیں رکھا بلکہ اس کی جڑیں بارہویں اور تیرہویں صدی تک تلاش کی ہیں۔ ان کے مطابق لیہ کی سرزمین محض ایک جغرافیائی خطہ نہیں بلکہ صدیوں کو محیط علمی، روحانی، تہذیبی اور فکری روایت کی امین ہے۔ یہی وجہ ہے کہ اس خطے نے مختلف ادوار میں ایسے اہلِ علم، صوفیا، ادبا، شعرا، محققین، علما، دانش وروں اور سماجی شخصیات کو جنم دیا جنھوں نے اپنے اپنے میدان میں گراں قدر خدمات انجام دیں۔
لیہ کی کلاسیکی دانش کا آغاز معروف صوفی بزرگ بہاء الدین زکریا ملتانی کے علمی و روحانی حوالوں سے ہوتا ہے۔ جعفر بلوچ کے مطابق ان کی جائے پیدائش کروڑ لعل عیسن تھی۔ ان کی ولادت 1170ء جبکہ وصال 1266ء میں ہوا۔ انھوں نے فقہی اور دینی موضوعات پر علمی کام کیا۔ تذکرۂ بہاء الدین زکریا ملتانی کے حوالے سے ان کی تین تصانیف کا ذکر ملتا ہے، اگرچہ ان کی اشاعت کے واضح شواہد موجود نہیں۔ ان تصانیف میں کتاب الاوراد، ایک رسالہ، وصایائے شیخ اور کچھ متفرق اشعار شامل ہیں۔ یہ حوالہ اس امر کی دلیل ہے کہ لیہ کی سرزمین صدیوں قبل ہی علمی و فکری سرگرمیوں کا مرکز بن چکی تھی۔
اسی طرح علمی، ادبی اور دینی روایت کے تسلسل میں علامہ فرزند علی گرواں، قاضی ابوبکر، حضرت نور محمد، میاں غلام حیدر فرشتہ، غلام حسن سواگ، غلام حیدر سواگ، مولانا حامد علی خان اور عبدالکریم چانڈیہ جیسے معتبر نام سامنے آتے ہیں۔ ان شخصیات نے دینیات، تصوف، زبان و بیان اور روایت و تہذیب کے میدان میں اپنی خدمات سے لیہ کی علمی بنیادوں کو مضبوط کیا۔
قیامِ پاکستان سے قبل لیہ کی علمی روایت صرف شعر و ادب تک محدود نہ تھی بلکہ تجارت، سیاست، سماجی خدمات اور معاشی فکر تک بھی پھیلی ہوئی تھی۔ اس ضمن میں لالہ ہرکشن لال کا نام نہایت اہمیت کا حامل ہے۔ 1864ء میں لیہ میں پیدا ہونے والے لالہ ہرکشن لال برصغیر کے معروف صنعت کار، کاروباری شخصیت اور سیاست دان تھے۔ وہ Punjab National Bank کے شریک بانیوں میں شامل تھے۔ اس کے علاوہ پنجاب کاٹن پریس کمپنی لمیٹڈ، پیپلز بینک آف انڈیا لمیٹڈ، امرتسر بینک لمیٹڈ اور کانپور فلور ملز لمیٹڈ جیسے اداروں کے قیام میں بھی ان کا نمایاں کردار تھا۔ انھوں نے انڈین ایسوسی ایٹڈ چیمبر آف کامرس کے قیام میں بنیادی کردار ادا کیا جو بعد ازاں Federation of Indian Chambers of Commerce and Industry کی تشکیل کا پیش خیمہ ثابت ہوا۔ بطور سیاست دان وہ 1920ء سے 1923ء تک پنجاب حکومت کے وزیرِ زراعت بھی رہے۔ ان کی شخصیت اس حقیقت کی مظہر ہے کہ لیہ کی دانش محض ادبی نہ تھی بلکہ عملی زندگی کے مختلف میدانوں میں بھی متحرک اور مؤثر تھی۔(ہری لال1937 میں لاھور میں فوت ہوئے)
قیامِ پاکستان سے قبل راجہ عبداللہ نیاز، دامن عباسی، علامہ مرید حسین ڈوگر، رب نواز شکستہ اور محمد حسین آزاد بزدار جیسے نام علم و ادب کے افق پر روشن رہے۔ ان شخصیات نے زبان، ادب، روایت اور شعری اظہار کو جلا بخشی اور آنے والی نسلوں کے لیے ایک فکری راستہ متعین کیا۔
قیامِ پاکستان کے بعد لیہ میں علم و ادب کی روایت مزید مضبوط ہوئی۔ بابا غلام محمد قاصر، حکیم فدا حسین اویس، نذیر چودھری، غافل کرنالی، ارمان عثمانی، عثمان خان، گلزار محبوب، مولوی محمود، نسیم لیہ، میاں الٰہی بخش سرائی، ڈاکٹر قیصر عباس اور فضل حق رضوی نے اردو شعر و ادب کی آبیاری میں نمایاں کردار ادا کیا۔
بعد ازاں جعفر بلوچ، عدیم صراطی، شہباز نقوی اور ڈاکٹر فیاض قادری جیسے اہلِ قلم نے اس روایت کو نئی فکری جہتیں عطا کیں۔ ان اہلِ دانش نے نہ صرف ادب تخلیق کیا بلکہ تحقیق، تنقید، تاریخ نویسی اور تہذیبی شعور کو بھی فروغ دیا۔
لیہ کی علمی روایت میں ڈاکٹر مہر عبدالحق کا مقام نہایت بلند ہے۔ انھوں نے علمی، ادبی، لسانی اور فریدیات کے حوالے سے بین الاقوامی شہرت حاصل کی۔ اگرچہ ان کی علمی شناخت عالمی سطح پر قائم ہوئی مگر ان کی جنم بھومی، تہذیبی حوالہ اور فکری تشکیل لیہ ہی سے وابستہ رہی۔ اسی طرح ڈاکٹر خیال امروہوی اردو اور فارسی کے مستند عالم اور تخلیق کار تھے۔ انھوں نے لیہ میں بیٹھ کر ملک گیر شہرت حاصل کی اور ثابت کیا کہ علمی عظمت کے لیے بڑے شہروں کا محتاج ہونا ضروری نہیں۔
پروفیسر نواز صدیقی نے غالبیات، تحقیق، تنقید اور شاعری میں گراں قدر خدمات انجام دیں۔ ان کی علمی کاوشوں نے لیہ کی ادبی شناخت کو مزید مستحکم کیا۔ ان تمام شخصیات نے مل کر لیہ میں علم و ادب، دانش و بینش اور فکری شعور کی ایسی توانا روایت قائم کی جس کے اثرات آج بھی نمایاں ہیں۔
حقیقت یہ ہے کہ لیہ کی سرزمین محض ایک جغرافیائی اکائی نہیں بلکہ صدیوں کو محیط علمی، روحانی، ادبی اور تہذیبی ورثے کی امین ہے۔ یہاں کی کلاسیکی دانش نے مختلف ادوار میں ایسے رجالِ علم پیدا کیے جنھوں نے مذہب، ادب، لسانیات، سیاست، تجارت، تنقید، تحقیق اور تصوف کے میدانوں میں نمایاں خدمات انجام دیں۔ یہی وجہ ہے کہ آج لیہ کی شناخت صرف ایک ضلع یا خطہ نہیں بلکہ علم و ادب، فکری روایت اور تہذیبی شعور کی علامت بن چکی ہے۔۔
