ڈسٹرکٹ جیل لَیَّہ میں ذہنی صحت اور اسٹریس مینجمنٹ پر آگاہی سیمینار جیل ملازمین کو ذہنی دباؤ سے بچاؤ، مثبت سوچ اور پیشہ ورانہ صلاحیتوں میں بہتری سے متعلق آگاہی فراہم

لیہ(نمائندہ لیہ ٹی وی)ڈسٹرکٹ جیل لیہ میں ملازمین کی ذہنی صحت، اسٹریس مینجمنٹ اور پیشہ ورانہ صلاحیتوں میں بہتری کے حوالے سے آگاہی سیمینار کا انعقاد کیا گیا۔ سیمینار کا مقصد ملازمین کو ذہنی دباؤ سے بچاؤ، مثبت سوچ، خود نگہداشت اور سخت ڈیوٹی کے دوران ذہنی توازن برقرار رکھنے سے متعلق آگاہی فراہم کرنا تھا۔ تقریب میں ڈسٹرکٹ کنسلٹنٹ سائیکاٹرسٹ ڈاکٹر محمد تحسین اختر، میڈیکل آفیسر ڈاکٹر محمد شعیب، سپرنٹنڈنٹ ڈسٹرکٹ جیل لیہ کامران حیدر اعوان سمیت جیل ملازمین اور انتظامی افسران نے شرکت کی۔ سیمینار سے خطاب کرتے ہوئے سپرنٹنڈنٹ کامران حیدر اعوان نے کہا کہ جیل ملازمین کی ڈیوٹی حساس اور مشکل نوعیت کی ہوتی ہے، اس لیے مثبت سرگرمیوں، نماز کی پابندی، گھر والوں کو وقت دینے اور مثبت سوچ اپنانے سے ذہنی سکون حاصل کیا جا سکتا ہے۔ انہوں نے کہا کہ ملازمین میں صحت مند سرگرمیوں کے فروغ کیلئے کھیلوں کے انعقاد پر خصوصی توجہ دی جا رہی ہے۔ ڈاکٹر محمد تحسین اختر نے ذہنی صحت، ورک بیلنس اور اسٹریس مینجمنٹ کے مختلف پہلوؤں پر گفتگو کرتے ہوئے کہا کہ مناسب نیند، اچھی غذا، آرام اور دوسروں سے بات چیت ذہنی دباؤ کم کرنے میں اہم کردار ادا کرتی ہے۔ سیمینار کے اختتام پر ملازمین نے اسے مفید قرار دیتے ہوئے انتظامیہ اور ماہرین کا شکریہ ادا کیا۔