لیہ(نمائندہ لیہ ٹی وی) لیہ کےنواحی علاقے جمن شاہ میں انسانیت سوز واقعہ سامنے آیا ہے جہاں ایک نجی تعلیمی ادارے ‘اقراء پبلک سکول’ کے پرنسپل نے اپنی ہی طالبہ کو ہوس کا نشانہ بنا ڈالا۔ متاثرہ لڑکی کے والد محمد سلیم کی مدعیت میں تھانہ کوٹ سلطان پولیس نے ملزم کاشف نواز کے خلاف سنگین دفعات کے تحت مقدمہ درج کر کے کارروائی کا آغاز کر دیا ہے۔ایف آئی آر کے مطابق، ملزم کاشف نواز ولد محمد نواز گزشتہ 7 ماہ سے آٹھویں جماعت کی 14 سالہ طالبہ کو سکول میں قائم اپنی اکیڈمی میں زیادتی کا نشانہ بناتا رہا۔ ملزم نے مبینہ طور پر طالبہ کی نازیبا ویڈیوز بھی بنائیں جن کی بنیاد پر اسے بلیک میل کیا جاتا رہا اور خاموش رہنے کے لیے جان سے مارنے کی دھمکیاں دی گئیں۔متاثرہ لڑکی کی حالت غیر ہونے اور مسلسل پریشانی کے باعث جب والدین نے کریدا تو اس نے روتے ہوئے تمام حقیقت بیان کر دی۔ مدعی مقدمہ کا کہنا ہے کہ ملزم نے نہ صرف ان کی بیٹی کی زندگی برباد کی بلکہ اسے سوشل میڈیا پر ویڈیو وائرل کرنے کی دھمکیاں بھی دیتا رہا۔ پولیس نے دفعہ 376iii اور 292 ت پ کے تحت مقدمہ درج کر لیا ہے، مزید تفتیش جاری ہے۔
