اسلام آباد (لیہ ٹی وی) عمران خان کو اڈیالہ جیل راولپنڈی سے لاہور کی کوٹ لکھپت جیل منتقل کرنے کا دوبارہ امکان پیدا ہوگیا۔ حکومت پنجاب نے جیل کے قواعد و ضوابط میں بنیادی تبدیلی کر دی ہے، جس کے تحت ملزموں اور مجرموں کو ان کے اقامتی شہر یا ضلع میں سزا کاٹنے کے لیے رکھا جائے گا۔ اطلاعات کے مطابق عمران خان کو اڈیالہ میں تمام سہولتیں میسر ہیں اور انہیں کسی بھی لمحے موت کی کوٹھڑی یا چکی میں نہیں رکھا گیا۔ ان کے لیے خوراک اور دیگر سہولتوں کی کوئی رکاوٹ نہیں۔ حکام کے مطابق دنیا کی کسی جیل میں انتظامیہ کسی بیرک میں روشنی ختم کرنے کا سوچ بھی نہیں سکتی کیونکہ یہ ایک سیکیورٹی تھریٹ ہوتا ہے۔ عمران خان کی لاہور منتقلی سے قبل مختلف امور کا تفصیلی جائزہ لیا جا رہا ہے۔
