لاہور: پی ڈی ایم اے نے آئندہ 24 گھنٹوں کے دوران صو با ئی دارالحکو مت لا ہور سمیت پنجاب کے بیشتر اضلاع میں بارش کی پیشگوئی کی ہے اور بارشوں کا یہ سلسلہ 20اگست تک جاری رہے گا۔.ترجمان کے مطا بق ہفتہ کو پنجاب کے بیشتر اضلاع میں موسلا دھار بارش ریکارڈ ہو ئی، سب سے زیا دہ با رش لاہور میں 50ملی میٹر ، ساہیوال میں 79،ٹوبہ ٹیک سنگھ 77،سیالکوٹ 41،گوجرانولہ 50، فیصل آباد 57 ،ملتان 37 ، خانیوال 67،رحیم یار خان 79، ڈیرہ غازی خان 57، بہاولپور 26، بھکر 14 اور جوہرآباد میں 8ملی میٹر بارش ریکارڈ کی گئی۔ترجمان کے مطا بق آئندہ 24 گھنٹوں میں پنجاب کے بیشتر اضلاع لاہور، راولپنڈی، فیصل آباد، گوجرانولہ، ملتان، بہاولپور، سرگودھا، گجرات، ڈیرہ غازی خان اور ساہیوال میں بارشیں متوقع ہیں۔ ڈی جی پی ڈی ایم اے عرفان علی کاٹھیا نے کہاہے کہ صوبہ بھر کے ڈپٹی کمشنرز کو اس سلسلہ میں الرٹ ر ہنے کی ہدایت کی گئی ہے۔پی ڈی ایم اے کنٹرول روم میں صورتحال کی مانیٹرنگ مسلسل جاری ہے۔ڈی جی نے کہا کہ نشیبی علاقوں سے پانی کی نکاسی کو جلد از جلد ممکن بنائیں ۔انہوں نے کہا کہ مون سون بارشوں کے باعث پنجاب کے دریائوں، ندی، نالوں میں طغیانی کا خدشہ ہے۔ترجمان نے بتایا کہ دریائے سندھ میں نچلے درجے کی سیلابی صورتحال برقرار ہے جبکہ دریائے چناب میں آئندہ 24 گھنٹوں میں اونچے درجے کے سیلاب کا خدشہ ہے،دریائے چناب میں پانی کی سطح بڑھ کر 2لاکھ 50 ہزار کیوسک تک جانے کا امکان ہے ،ممکنہ سیلابی صورتحال کے پیش نظر تمام انتظامات مکمل ہیں۔ڈی جی عرفان کاٹھیا نے کہا کہ دریائے راوی میں جسڑ اور شاہدرہ کے مقام پر پانی کا بہائو معمول کے مطابق ہے ۔ انہوں نے کہا کہ شہری احتیاط کریں، بجلی کے کھمبوں اور لٹکتی تاروں،کچے مکانات اور بوسیدہ عمارتوں سے دور رہیں،بچوں کا خاص خیال رکھیں اور انہیں نشیبی علاقوں میں جمع پانی کے قریب ہرگز نہ جانے دیں۔
