بشریٰ بی بی کی 32 مقدمات میں عبوری ضمانت منظور، 13 جنوری تک توسیع عدالت میں پیش ہونے پر بشریٰ بی بی کی جانب سے ضمانتی مچلکے جمع کرائے گئے، سیکیورٹی کے سخت انتظامات

راولپنڈی (لیہ ٹی وی) انسدادِ دہشت گردی کی عدالت نے بشریٰ بی بی کی 32 مقدمات میں عبوری ضمانت منظور کر لی۔ جج امجد علی شاہ کی سربراہی میں 26 نومبر کو ڈی چوک پر ہونے والے احتجاج سے متعلق بشریٰ بی بی کے خلاف درج 32 مقدمات میں درخواستِ ضمانت کی سماعت کی گئی، جس میں بشریٰ بی بی خود عدالت میں پیش ہوئیں۔ دورانِ سماعت، بشریٰ بی بی نے ضمانتی مچلکے بھی جمع کرائے، جس کے بعد انسدادِ دہشت گردی کی عدالت نے ان کی عبوری ضمانت 13 جنوری تک منظور کی۔ اس موقع پر عدالت کے باہر سیکیورٹی کے سخت انتظامات کیے گئے تھے۔ اس سے قبل بدھ کو پشاور ہائی کورٹ نے بشریٰ بی بی کی حفاظتی ضمانت میں توسیع کر دی تھی۔ اس سماعت میں جسٹس صاحبزادہ اسد اللہ اور جسٹس وقار احمد نے بشریٰ بی بی کے خلاف مقدمات کی تفصیل کی فراہمی کے لیے درخواست پر سماعت کی۔ بشریٰ بی بی کے خلاف درج مقدمات کی نوعیت اور ان کی حفاظتی ضمانتوں کی توسیع سے متعلق کارروائیوں کا سلسلہ جاری ہے، جس میں عدالت نے انہیں 16 جنوری تک حفاظتی ضمانت فراہم کی ہے۔