ڈی پی او لیہ کا کرسمس کے موقع پر مسیحی پولیس ملازمین سے ملاقات، تحائف اور رخصت کا اعلان

لیہ (نمائندہ لیہ ٹی وی) کرسمس کے خوشی کے موقع پر ڈی پی او لیہ محمد علی وسیم نے پولیس لائنز میں مسیحی پولیس ملازمین سے ملاقات کی اور ان کے ساتھ کرسمس کی خوشیاں منائیں۔ پروگرام کا آغاز ڈی پی او لیہ محمد علی وسیم اور دیگر پولیس افسران کی موجودگی میں کیا گیا، جہاں ڈی پی او نے مسیحی ملازمین کے ساتھ کیک کاٹا اور اس موقع پر اپنے خیالات کا اظہار کیا۔ ڈی پی او محمد علی وسیم نے کہا کہ پاکستان کے قیام اور استحکام میں اقلیتی برادری کا کردار انتہائی اہم اور بے مثال ہے۔ انہوں نے اس بات پر زور دیا کہ ہمارے وطن میں تمام مذاہب کے پیروکاروں کا یکساں احترام کیا جاتا ہے، اور ان کی فلاح و بہبود کی ذمہ داری ہم سب پر عائد ہوتی ہے۔ تقریب کے دوران ڈی پی او لیہ نے مسیحی پولیس ملازمین کو کرسمس کے خصوصی تحائف دیے اور ان کی خوشیوں میں شریک ہوئے۔ ڈی پی او نے اس بات پر بھی زور دیا کہ اقلیتی برادری کی حفاظت اور ان کی فلاح کے لیے پولیس اپنی تمام تر کوششیں جاری رکھے گی تاکہ وہ اپنے مذہبی تہوار بھرپور طریقے سے منا سکیں۔آخر میں، ڈی پی او محمد علی وسیم نے ایک اور خوبصورت قدم اٹھاتے ہوئے مسیحی پولیس ملازمین کے لیے 4 یوم کی رخصت دینے کا اعلان کیا، تاکہ وہ اپنے خاندان کے ساتھ کرسمس کی خوشیاں منا سکیں۔ اس اقدام کو ملازمین نے بھرپور پذیرائی دی اور ڈی پی او کا شکریہ ادا کیا۔ اس موقع پر پولیس ملازمین کے چہرے خوشی سے روشن نظر آ رہے تھے۔