ملتان (لیہ ٹی وی)پرائیویٹ ہاؤسنگ سکیموں میں پلاٹوں کی خریدو فروخت میں ہونے والے فراڈ سے عوام کو محفوظ رکھنےکے لئے ایم ڈی اے میں اہم اجلاس۔ اجلاس میں نیب ملتان ، کمشنر آفس ملتان، ڈپٹی کمشنر آفس ملتان ، لوکل گورنمنٹ اور کارپوریشن ملتان سمیت دیگر محکموں کے نمائندوں نے شرکت کی ۔اجلاس میں پرائیویٹ ہاؤسنگ سکیموں میں پلاٹ کی خریدو فروخت کرنے والے عوام کی شکایات ،مسائل اور ان کے حل بارے تفصیلی گفتگو کی گئی ۔عوام الناس کو ڈویلپرز کے فراڈ سے بچانے کے لئے سوشل میڈیا ، پرنٹ اور الیکٹرانک میڈیا پراگاہی مہم چلانے کا اعادہ کیا گیا۔ہاوسنگ سکیموں کی منظوری سے متعلقہ تمام اداروں کے نمائندوں سے ہاوسنگ سکیموں کی منظوری کو آسان اور سادہ بنانے کے لئے رولز میں مناسب تبدیلیاں لانےکے لئے تجاویز بھی لی گئیں ۔ پہلے سے موجود غیر منظور شدہ ہاوسنگ سکیموں کو ریگولر کرنے کے لئے کمیشن بنانے کی تجاویز پر بھی غور کیا گیا ۔اجلاس میں شریک نمائندگان نے ملتان شہر میں عوام الناس کو سستی اور معیاری رہائشی سہولیات دینے کے لئے سرکاری طور پر لو انکم ہاوسنگ سکیمیں بنانے کی بھی تجاویز بھی دیں۔ملتان شہر میں لو انکم ہاؤسنگ سکیموں کے فقدان کی وجہ سے غیر قانونی ہاؤسنگ سکیمیں وجود میں آتی ہے۔اجلاس میں فیصلہ کیاگیا کہ پرائیویٹ ہاؤسنگ سکیموں میں ڈویلپرز کی طرف سے منظوری سے قبل ترقیاتی کام اور پلاٹوں کی تعداد کو موقع پر یقینی بنایا جائے گا۔ تاکہ عوام الناس کوڈویلپمنٹ کی مد میں غیر ضروری اضافی رقم سے بچایا جا سکے۔ڈائریکٹر جنرل ایم ڈی اے نے اجلاس میں شریک تمام اداروں کے نمائندوں کا شکریہ ادا کیا اور ایم ڈی اے کی طرف سے غیر قانونی ہاوسنگ سکیموں کے خلاف ایکشن میں تعاون کی بھی یقین دہانی کرائی گئی ۔
