لیہ: 11ویں تھل جیپ ریلی اور لیہ تھل میلہ کے انتظامات کا آغاز کر دیا گیا ہے۔ ٹریک، مرکزی اسٹیج اور ثقافتی اسٹالز کے مقامات کی نشاندہی اور تیاری کے لیے فیلڈ اسٹاف کو متحرک جبکہ انتظامات کی مؤثر نگرانی کے لیے افسران کو ذمہ داریاں سونپ دی گئی ہیں۔اس سلسلے میں ایڈیشنل ڈپٹی کمشنر جنرل شبیر احمد ڈوگر کی زیر صدارت کمیٹی روم میں تھل جیپ ریلی اور لیہ تھل میلہ کی کور مینجمنٹ کمیٹی کا اجلاس منعقد ہوا۔ اجلاس میں ایڈیشنل ڈپٹی کمشنر ہیڈ کوارٹر اویس سرور، ایڈیشنل ڈپٹی کمشنر سوشل سروسز خضر ظہور، اسسٹنٹ کمشنر لیہ زوہیب کریم، ایڈیشنل ڈائریکٹر لائیو اسٹاک ڈاکٹر طارق گدارہ، چیف آفیسر ضلع کونسل محمد فیصل، ڈپٹی ڈائریکٹر ڈویلپمنٹ عصمت اللہ، اسسٹنٹ ڈائریکٹر پلاننگ اسحاق کھیرانی اور دیگر متعلقہ افسران نے شرکت کی، جبکہ اسسٹنٹ کمشنر چوبارہ ذوالفقار صابر اور اسسٹنٹ کمشنر کروڑ لعل عیسن اصغر علی ویڈیو لنک کے ذریعے اجلاس میں شریک ہوئے۔ اجلاس میں تھل جیپ ریلی کے موقع پر تحصیل چوبارہ کے علاقے رکھ خیرے والا میں منعقد ہونے والے چار روزہ رنگا رنگ ثقافتی میلے کے پروگراموں، انتظامی امور اور تیاریوں کا تفصیلی جائزہ لیا گیا۔ اس موقع پر ایڈیشنل ڈپٹی کمشنر جنرل شبیر احمد ڈوگر نے کہا کہ تھل جیپ ریلی کے موقع پر شائقین اور شہریوں کے لیے بھرپور تفریحی سرگرمیوں پر مشتمل ثقافتی میلہ سجایا جائے گا، جس میں تھل کی روایتی ثقافت، علاقائی کھیلوں اور لوک فنون کو اجاگر کیا جائے گا۔ میلے میں جھومر، ثقافتی رقص، اونٹ اور گھوڑا ڈانس، کبڈی، دیسی کشتی، رسہ کشی، تیر اندازی، نیزہ بازی، والی بال، میوزیکل نائٹ اور آتش بازی سمیت مختلف رنگا رنگ سرگرمیاں منعقد کی جائیں گی۔ انہوں نے ہدایت کی کہ تمام متعلقہ محکمے باہمی رابطے اور مربوط حکمت عملی کے تحت انتظامات بروقت مکمل کریں۔ ٹریک، مرکزی اسٹیج، ثقافتی اسٹالز اور دیگر مقامات کی تیاریوں کو مقررہ وقت میں مکمل کیا جائے جبکہ صفائی ستھرائی، سکیورٹی، ٹریفک مینجمنٹ اور شائقین کو سہولیات کی فراہمی پر خصوصی توجہ دی جائے تاکہ تھل جیپ ریلی اور لیہ تھل میلہ کو کامیاب، محفوظ اور یادگار بنایا جا سکے۔
