لیہ: ڈپٹی کمشنر آصف علی ڈوگر نے تحصیل چوبارہ میں تھل جیپ ریلی کے مقام رکھ خیرے والا کا دورہ کیا اور 11ویں تھل جیپ ریلی و لیہ تھل میلہ کے انتظامات کا جائزہ لیا۔انہوں نے میگا ایونٹ کے انعقاد کے لیے جاری تیاریوں کا معائنہ کرتے ہوئے ہدایت کی کہ ٹریک کی تیاری، پنڈال، پارکنگ، فوڈ سٹریٹ، سکیورٹی، صفائی ستھرائی اور شائقین کو سہولیات کی فراہمی کے انتظامات بروقت مکمل کیے جائیں۔ڈپٹی کمشنر نے کہا کہ تھل جیپ ریلی اور لیہ تھل میلہ ضلع لیہ کی ثقافت اور سیاحت کے فروغ کا اہم ایونٹ ہے۔ اس میں عوام اور سیاحوں کی بھر پور شرکت یقینی بنانے کے لیے بہترین انتظامات کیے جائیں۔ انہوں نے تمام متعلقہ محکموں کو باہمی رابطے اور مربوط حکمت عملی کے تحت کام کرنے کی ہدایت کی، تاکہ میگا ایونٹ کو کامیاب اور یادگار بنایا جا سکے۔بعد ازاں ڈپٹی کمشنر نے زیر تعمیر پیرا آفس، ریسٹ ہاؤس اور اسسٹنٹ کمشنر آفس کے تعمیراتی کام کا معائنہ کیا اور متعلقہ حکام کو ہدایت کی کہ تعمیراتی کام مقررہ معیار کے مطابق جلد از جلد مکمل کیا جائے۔ڈپٹی کمشنر نے تحصیل ہیڈکوارٹر ہسپتال چوبارہ کے مختلف شعبوں کا بھی معائنہ کیا اور مریضوں سے طبی سہولیات کی فراہمی کے بارے میں دریافت کیا۔ اس موقع پر اسسٹنٹ کمشنر تحصیل چوبارہ ذوالفقار صابر اور متعلقہ افسران بھی ان کے ہمراہ تھے۔
