لیہ: ہسپتالوں کی صفائی، صحت سہولیات اور انسداد ڈینگی اقدامات کا جائزہ

لیہ: اسسٹنٹ کمشنر لیہ زوہیب کریم کی زیر صدارت تحصیل ہیلتھ کونسل کا اجلاس ان کے دفتر میں منعقد ہوا، جس میں ہسپتالوں کی صفائی ستھرائی، بیوٹیفکیشن، صحت سہولیات، جینیٹوریل سٹاف کی تنخواہوں اور انسداد ڈینگی کے لیے جاری اقدامات اور انتظامات کا تفصیلی جائزہ لیا گیا۔ اجلاس میں میڈیکل سپرنٹنڈنٹ تھل ہسپتال ڈاکٹر محمد نعیم، ایم ایس چوک اعظم ڈاکٹر ارشد بپی اور متعلقہ افسران نے شرکت کی۔ اسسٹنٹ کمشنر زوہیب کریم نے اجلاس سے خطاب کرتے ہوئے کہا کہ ہسپتالوں کی صفائی ستھرائی، بیوٹیفکیشن، اور سروس ڈیلوری پر خصوصی توجہ دی جائے۔ اسسٹنٹ کمشنر نے کہا کہ جینیٹوریل سٹاف کی تنخواہوں کی بروقت ادائیگی کو یقینی بنایا جائے اور ہسپتالوں میں ادویات کی دستیابی اور سٹاف کی حاضری کا ریکارڈ اپ ڈیٹ رکھا جائے۔ اسسٹنٹ کمشنر زوہیب کریم نے بدلتے موسمی حالات کے پیش نظر ہدایت کی کہ ڈینگی لاروے کے خاتمے کے لیے تمام ہاٹ اسپاٹس کی کڑی نگرانی یقینی بنائی جائے اور جہاں ضرورت ہو، وہاں لاروا کش ادویات کا چھڑکاؤ اور مچھر مار اسپرے کیا جائے تاکہ ڈینگی کے پھیلاؤ کو روکا جا سکے۔ انہوں نے مزید ہدایت کی کہ بخار میں مبتلا مشتبہ مریضوں کی بروقت تشخیص کے لیے ضروری ٹیسٹ اور علاج معالجے کی سہولیات کی فراہمی میں کسی قسم کی غفلت یا کوتاہی نہ برتی جائے۔