لیہ:ایڈیشنل ڈپٹی کمشنر میونسپل سروسز شبیر احمد ڈوگر نے ڈسٹرکٹ ہیڈکوارٹر ہسپتال لیہ کا معائنہ کیا۔ انہوں نے ایمرجنسی، مختلف وارڈز، میڈیسن سٹور، آپریشن تھیٹر اور دیگر شعبہ جات کا دورہ کرتے ہوئے مریضوں کو فراہم کی جانے والی طبی سہولیات، ادویات کی دستیابی، صفائی ستھرائی اور ہسپتال کے مجموعی انتظامات کا جائزہ لیا۔ انہوں نے ڈاکٹرز و طبی عملے کی حاضری اور ڈیوٹی روسٹر بھی چیک کیا جبکہ ہسپتال میں موجود مریضوں اور ان کے لواحقین سے ملاقات کرکے علاج معالجے اور ادویات کی فراہمی کے بارے میں دریافت کیا۔ ایڈیشنل ڈپٹی کمشنر نے ہدایت کی کہ مریضوں کو معیاری طبی سہولیات کی فراہمی میں کسی قسم کی کوتاہی نہ برتی جائے اور ضروری ادویات کی دستیابی یقینی بنائی جائے۔ انہوں نے ہسپتال میں صفائی ستھرائی کے انتظامات مزید بہتر بنانے، واش رومز کی باقاعدہ صفائی اور مریضوں و لواحقین کے لیے صاف ستھرا ماحول برقرار رکھنے کی ہدایت کی۔ انہوں نے کہا کہ ہسپتال آنے والے مریضوں کو بروقت طبی سہولیات کی فراہمی اور ان کی مناسب دیکھ بھال انتظامیہ کی بنیادی ذمہ داری ہے۔
