لیہ: ایڈیشنل ڈپٹی کمشنر سوشل سروسز خضر ظہور کی زیر صدارت ڈسٹرکٹ پرزن ہیلتھ کونسل کا اجلاس منعقد ہوا۔ اجلاس میں چیف ایگزیکٹو آفیسر ہیلتھ ڈاکٹر شاہد ریاض، سپرنٹینڈنٹ ڈسٹرکٹ جیل لیہ محمد ارشد، میڈیکل سپرنٹینڈنٹ ڈسٹرکٹ ہیڈکوارٹر ہسپتال لیہ ڈاکٹر حیات اللہ اور میڈیکل آفیسر ڈسٹرکٹ جیل نے شرکت کی۔ اجلاس میں ڈسٹرکٹ جیل میں اسیران کو فراہم کی جانے والی طبی سہولیات، جیل کی سالانہ دیکھ بھال، رنگ و روغن اور تزئین و آرائش سمیت مختلف امور کا جائزہ لیا گیا۔ ایڈیشنل ڈپٹی کمشنر سوشل سروسز خضر ظہور نے جیل کے سالانہ رنگ و روغن اور تزئین و آرائش کے حوالے سے ہدایت کی کہ متعلقہ محکمے سے سکیم کا جامع تخمینہ تیار کروایا جائے تاکہ ضروری اقدامات بروقت مکمل کیے جا سکیں۔ اجلاس میں فیصلہ کیا گیا کہ جیل میں مقید اسیران کے لیے کنسلٹنٹ ڈاکٹرز کی ڈیوٹی روسٹر اور آن کال بنیادوں پر دستیابی یقینی بنائی جائے گی، تاکہ ضرورت کے وقت انہیں بروقت طبی معائنہ اور علاج کی سہولت فراہم کی جا سکے۔ ایڈیشنل ڈپٹی کمشنر سوشل سروسز خضر ظہور نے کہا کہ جیل اسیران کو معیاری صحت کی سہولیات کی فراہمی انتظامیہ کی اہم ذمہ داری ہے، اس حوالے سے تمام متعلقہ محکمے باہمی رابطے کے ساتھ اقدامات یقینی بنائیں۔
