لیہ:ضلع لیہ میں بریسٹ فیڈنگ ویک کے حوالے سے آگاہی سیمینار، واک کا انعقاد کیا گیا جس میں چیف ایگزیکٹو آفیسر ڈسٹرکٹ ہیلتھ اتھارٹی ڈاکٹر شاہد ریاض،ڈسٹرکٹ کوآرڈینیٹر ڈاکٹر مزمل کریم، ڈاکٹر عائشہ، فیلڈ پروگرام آفیسر محمد فہیم نواز سرگانی، ملک غلام یاسین، ملک امجد سمیت محکمہ صحت کے افسران و اہلکاروں نے شرکت کی۔سیمینار کے دوران ماں کے دودھ کی اہمیت، نومولود اور بچوں کی صحت و نشوونما پر اس کے مثبت اثرات اور پہلے چھ ماہ تک صرف ماں کا دودھ پلانے کے حوالے سے آگاہی فراہم کی گئی۔اس موقع پر چیف ایگزیکٹو آفیسر ڈسٹرکٹ ہیلتھ اتھارٹی ڈاکٹر شاہد ریاض،ڈاکٹر مزمل کریم ودیگر مقررین نے خطاب کرتے ہوئے کہا کہ ماں کا دودھ بچے کے لیے بہترین اور قدرتی غذا ہے جو نومولود کی صحت، نشوونما اور قوت مدافعت کے لیے انتہائی اہمیت رکھتا ہے۔ انہوں نے کہا کہ بچے کو زندگی کے پہلے چھ ماہ تک صرف ماں کا دودھ پلانا چاہیے جبکہ بعد ازاں مناسب اضافی غذا کے ساتھ ماں کا دودھ جاری رکھنا بچے کی بہتر صحت و نشوونما میں اہم کردار ادا کرتا ہے۔ انہوں نے کہا کہ بریسٹ فیڈنگ کے فروغ کے لیے والدین، خاندان اور معاشرے کا تعاون نہایت ضروری ہے تاکہ ماؤں کو ماں کا دودھ پلانے کے لیے سازگار ماحول فراہم کیا جا سکے۔سیمینار کے بعد ماں کے دودھ کی اہمیت کو اجاگر کرنے کے لیے آگاہی واک کا بھی انعقاد کیا گیا، جس میں محکمہ صحت کے افسران اور ہیلتھ ٹیموں نے شرکت کی۔ اس موقع پر شرکاء نے ماں کے دودھ کی اہمیت اور بچوں کی بہتر صحت کے حوالے سے آگاہی پیغامات اجاگر کیے۔بریسٹ فیڈنگ ویک کے دوران ضلع بھر میں محکمہ صحت کی فیلڈ ٹیموں کی جانب سے کمیونٹی آگاہی سیشنز کا انعقاد کیا جائے گا جبکہ گھر گھر جا کر ماؤں اور خاندانوں کو ماں کے دودھ کی اہمیت اور اس کے فوائد سے آگاہ کیا جائے گا۔ محکمہ صحت کی جانب سے بریسٹ فیڈنگ کے فروغ اور بچوں کی صحت و نشوونما کے حوالے سے آگاہی کا سلسلہ جاری رکھا جائے گا۔
