لیہ:لیہ فٹبال لیگ کے انتظامات آخری مراحل میں داخل ہو گئے ہیں۔ اس سلسلہ میں ایڈیشنل ڈپٹی کمشنر جنرل شبیر احمد ڈوگر کی زیر صدارت ان کے دفتر میں جائزہ اجلاس منعقد ہوا۔ اجلاس میں ڈپٹی ڈائریکٹر کالجز ذوالفقار علی حیدری، ایم ڈی واسا عارف عباس، ڈی ایس پی مصطفیٰ کمال، چیف آفیسر ضلع کونسل محمد فیصل، فٹبال کوچ عارف چھینہ، زاہد سرفراز اور متعلقہ افسران نے شرکت کی۔ ڈسٹرکٹ سپورٹس آفیسر امتیاز احمد بھٹی نے اجلاس کو لیہ فٹبال لیگ کے انتظامات، ٹیموں کی شرکت، کھیل کے میدان اور دیگر انتظامی امور کے حوالے سے تفصیلی بریفنگ دی۔ ایڈیشنل ڈپٹی کمشنر جنرل شبیر احمد ڈوگر نے اجلاس سے خطاب کرتے ہوئے کہا کہ لیہ فٹبال لیگ ایک میگا سپورٹس ایونٹ ہے جس کے کامیاب انعقاد کے لیے تمام محکمے باہمی رابطہ کاری اور مربوط حکمت عملی کے تحت فرائض سرانجام دیں۔ انہوں نے ہدایت کی کہ کھلاڑیوں اور شائقین کے لیے بہترین سہولیات، سکیورٹی، ٹریفک مینجمنٹ، صفائی ستھرائی اور دیگر ضروری انتظامات کو حتمی شکل دی جائے۔ انہوں نے کہا کہ فٹبال لیگ کے ذریعے نوجوانوں کو مثبت سرگرمیوں کی جانب راغب کرنے کے ساتھ ساتھ عوام کو بہترین تفریح بھی فراہم کی جائے گی۔ تمام متعلقہ محکمے اپنی ذمہ داریاں احسن انداز میں انجام دیتے ہوئے ایونٹ کو شاندار اور یادگار بنانے کے لیے بھرپور کردار ادا کریں۔
