صدرانجمن تاجران لیہ حاجی اظہر حسین ہانس نے چیئرمین تنویر احمد خان کو عہدے سے فارغ کرنے کا اعلان کردیا تنویر احمد خان ہمارے لیے قابل احترام ہیں، تاہم ان کے حالیہ اقدامات اور رویے سے مایوسی ہوئی، انجمن تاجران ان کے قول و فعل کی ذمہ دار نہیں، حاجی اظہر ہانس

لیہ : صدر انجمن تاجران لیہ حاجی اظہر حسین ہانس نے چیئرمین انجمن تاجران تنویر احمد خان کو اعزازی چیئرمین کے عہدے سے فارغ کرنے کا اعلان کرتے ہوئے کہا ہے کہ انجمن تاجران ان کے کسی قول و فعل کی ذمہ دار نہیں ہوگی۔اپنے بیان میں حاجی اظہر حسین ہانس نے کہا کہ تنویر احمد خان ان کے لیے انتہائی قابل احترام شخصیت ہیں اور انجمن تاجران نے ہمیشہ ان کی عزت و احترام کو ملحوظ خاطر رکھا ہے، تاہم ان کے بقول گزشتہ کچھ عرصے سے تاجر برادری اور انجمن تاجران کے حوالے سے تنویر احمد خان کے اقدامات اور رویے سے مایوسی ہوئی ہے۔انہوں نے کہا کہ وہ کسی کی کردار کشی نہیں کرنا چاہتے، تاہم ایک واقعے کا حوالہ دیتے ہوئے کہا کہ حال ہی میں ایک شخص نے تنویر احمد خان کی موجودگی میں انجمن تاجران کے خلاف مبینہ طور پر بے بنیاد اور نامناسب الزامات عائد کیے۔ ان کے مطابق اگر مذکورہ الزامات درست تھے تو تنویر احمد خان نے تین سال تک انجمن تاجران کے اعزازی چیئرمین کے عہدے پر رہنے کے باوجود اس حوالے سے استعفیٰ کیوں نہیں دیا، جبکہ اگر الزامات غلط تھے تو ان کی موجودگی میں انجمن تاجران کا دفاع کیوں نہیں کیا گیا۔حاجی اظہر حسین ہانس نے کہا کہ ان کے خیال میں اس صورتحال سے چیئرمین کے عہدے کے وقار پر اثر پڑا ہے۔ انہوں نے اعلان کیا کہ انجمن تاجران نے فیصلہ کیا ہے کہ تنویر احمد خان کو اعزازی چیئرمین کے عہدے پر برقرار نہیں رکھا جائے گا۔انہوں نے تاجر برادری اور سرکاری اداروں سے اپیل کی کہ تنویر احمد خان کو بطور چیئرمین انجمن تاجران ڈیل نہ کیا جائے۔ حاجی اظہر حسین ہانس نے واضح کیا کہ آئندہ انجمن تاجران ان کے کسی قول و فعل کی ذمہ دار نہیں ہوگی۔