لیہ: چیف منسٹر انسپکشن ٹیم کے چیف نعیم غوث نے وزیراعلیٰ پنجاب مریم نواز شریف کے احکامات پر ضلع لیہ کے مختلف سرکاری اداروں کے معائنہ کے سلسلہ میں پولیس خدمت مرکز ڈی پی او آفس اور سب رجسٹرار آفس تحصیل کمپلیکس کا دورہ کیا۔ اس موقع پر اسسٹنٹ کمشنر لیہ رانا زوہیب کریم نے معائنہ ٹیم کو متعلقہ اداروں کا معائنہ کروایا اور عوام کو فراہم کی جانے والی سہولیات و سروسز کے بارے میں بریفنگ دی۔ چیف منسٹر انسپکشن ٹیم کے چیف نعیم غوث نے پولیس خدمت مرکز ڈی پی او آفس کا تفصیلی معائنہ کیا اور شہریوں کو فراہم کی جانے والی پولیس سے متعلقہ مختلف سہولیات و خدمات کا جائزہ لیا۔ انہوں نے مرکز میں سروسز کی فراہمی، شہریوں کی رہنمائی، درخواستوں کے اندراج اور عوامی سہولت کے لیے کیے گئے اقدامات کا جائزہ لیا۔ بعد ازاں انہوں نے سب رجسٹرار آفس تحصیل کمپلیکس کا دورہ کیا جہاں رجسٹری اور ریونیو سے متعلقہ امور، دفتری ریکارڈ اور شہریوں کو فراہم کی جانے والی سہولیات کا معائنہ کیا گیا۔ اس دوران ریکارڈ کی مناسب دیکھ بھال، دفتری امور میں شفافیت اور شہریوں کے ریونیو و رجسٹری سے متعلقہ معاملات کو قواعد و ضوابط کے مطابق بروقت نمٹانے کے حوالے سے امور کا جائزہ لیا گیا۔ چیف منسٹر انسپکشن ٹیم کے چیف نعیم غوث نے اس موقع پر کہا کہ وزیراعلیٰ پنجاب مریم نواز شریف کے احکامات اور عوام دوست پالیسی کے مطابق سرکاری اداروں میں شہریوں کو بروقت، شفاف اور معیاری سہولیات کی فراہمی یقینی بنانا اولین ترجیح ہے۔ پولیس خدمت مراکز پر شہریوں کو پولیس سے متعلقہ خدمات کے حصول میں آسانی، فوری رہنمائی اور سہولت فراہم کی جائے جبکہ ریونیو و رجسٹری سے متعلقہ معاملات میں شفافیت، میرٹ اور مقررہ قواعد و ضوابط پر مکمل عملدرآمد یقینی بنایا جائے۔ انہوں نے کہا کہ سرکاری اداروں کی کارکردگی میں بہتری اور عوام کو بہتر سروسز کی فراہمی وزیراعلیٰ پنجاب مریم نواز شریف کے عوامی فلاحی ایجنڈے کا اہم حصہ ہے، اس لیے تمام متعلقہ ادارے شہریوں کے مسائل کے بروقت ازالے اور بہترین عوامی خدمت کو یقینی بنائیں۔
