لیہ: ایڈیشنل ڈپٹی کمشنر ہیڈ کوارٹر محمد اویس سرور کی زیر صدارت وزیراعلیٰ پنجاب کے کلیدی کارکردگی اشاریوں اور پرائس کنٹرول سے متعلق جائزہ اجلاس منعقد ہوا۔ اجلاس میں متعلقہ محکموں کے افسران اور پرائس کنٹرول مجسٹریٹس نے شرکت کی۔ اجلاس میں پرائس کنٹرول مجسٹریٹس کی کارکردگی کا جائزہ لیا گیا۔ ایڈیشنل ڈپٹی کمشنر ہیڈ کوارٹر محمد اویس سرور نے ہدایت کی کہ پرائس کنٹرول مجسٹریٹس فیلڈ میں اپنی موجودگی یقینی بنائیں روزانہ کی بنیاد پر مارکیٹوں کی چیکنگ کریں، اشیائے ضروریہ کی قیمتوں کی پڑتال کریں، مقررہ نرخوں کے مطابق فروخت یقینی بنائیں اور دکانوں پر نرخ نامے نمایاں جگہ پر آویزاں کروائیں۔انہوں نے کہا کہ گرانفروشی اور ناجائز منافع خوری میں ملوث عناصر کے خلاف بلاامتیاز کارروائی عمل میں لائی جائے تاکہ شہریوں کو مقررہ نرخوں پر اشیائے ضروریہ کی فراہمی یقینی بنائی جا سکے۔ انہوں نے مزید کہا کہ وزیراعلیٰ پنجاب کے طے کردہ کلیدی کارکردگی اشاریے حکومت پنجاب کی ترجیحات کا عملی مظہر ہیں جن پر بروقت اور مؤثر عملدرآمد تمام متعلقہ محکموں کی ذمہ داری ہے تمام افسران اپنے متعلقہ اہداف پر خصوصی توجہ دیں، فیلڈ نگرانی مؤثر بنائیں اور مقررہ اہداف کے حصول کو یقینی بنایا جائے تاکہ حکومتی اقدامات کے ثمرات عوام تک پہنچ سکیں۔
