کراچی: نوجوان تاجر میر رضا کی لاش ملنے کے بعد واقعے کی تحقیقات سے متعلق اہم تفصیلات سامنے آگئی ہیں۔ تفتیشی ذرائع کے مطابق میر رضا کی لاش کی اطلاع 29 جولائی کو دوپہر 12 بج کر 36 منٹ پر ملی، تاہم کرائم سین یونٹ کی ٹیم فوری طور پر جائے وقوع پر نہیں پہنچ سکی۔
ذرائع کے مطابق لاش دوپہر 1 بج کر 45 منٹ تک جائے وقوع پر موجود رہی، جبکہ 2 بجے سے قبل ریسکیو اہلکاروں نے لاش جناح اسپتال منتقل کردی۔ بتایا گیا ہے کہ واقعے کے روز کرائم سین یونٹ کی ٹیم جائے وقوع پر نہیں پہنچی۔
تفتیشی ذرائع کا کہنا ہے کہ کرائم سین یونٹ کو دوپہر 3 بج کر 11 منٹ پر سوشل میڈیا کے ذریعے لاش ملنے کی اطلاع ملی، جبکہ ابتدائی تحقیقات میں یہ بات سامنے آئی ہے کہ کرائم سین یونٹ کو جائے وقوع پر آنے سے منع کیا گیا تھا۔
ذرائع کے مطابق لاش ملنے کے تقریباً 15 منٹ بعد تلاش کرنے والے ڈیوائس اہلکاروں کو بھی اطلاع دی گئی، تاہم وہ موقع پر نہیں پہنچے۔ کرائم سین یونٹ بعد ازاں اگلے روز جائے وقوع پر پہنچا اور اب تک 5 مرتبہ جائے وقوع کا دورہ کرچکا ہے۔
تفتیشی ذرائع کے مطابق لاش کی اطلاع سے قبل پولیس کو گلستانِ جوہر میں ڈکیتی کی اطلاع موصول ہوئی تھی، تاہم پولیس کو لاش ملنے کی جگہ کے بجائے گلستانِ جوہر بلاک 7 میں ڈکیتی کے مقام پر موجود رہنے کی ہدایت کی گئی۔ علاقائی پولیس کے بروقت جائے وقوع پر نہ پہنچنے کے باعث بھی اہم شواہد ضائع ہونے کا خدشہ ظاہر کیا گیا ہے۔
