کراچی: صوبائی وزیر سعید غنی نے سندھ کی تقسیم اور نئے صوبے کے مطالبے کو مسترد کرتے ہوئے کہا ہے کہ سندھ میں کسی صورت نیا صوبہ نہیں بنے گا۔ انہوں نے ایم کیو ایم پر سندھ میں نفرتیں پیدا کرنے کا الزام عائد کرتے ہوئے کہا کہ نئے صوبے کے لیے ایم کیو ایم کے چند افراد کی حیثیت کیا ہے۔
سعید غنی کا کہنا تھا کہ دیگر سیاسی جماعتیں بھی سندھ کی تقسیم کے خلاف ہیں، جبکہ مصطفیٰ کمال خود کہہ چکے ہیں کہ سکھر کے عوام نے صوبہ بنانے کی مخالفت کی ہے۔ انہوں نے کہا کہ ایم کیو ایم کے چند رہنما ایک دوسرے کے ساتھ بیٹھنے کو بھی تیار نہیں۔
جماعت اسلامی کے احتجاج پر صوبائی وزیر نے کہا کہ اگر جماعت اسلامی عوامی مسائل کے حل کے لیے احتجاج کرتی ہے تو کراچی کو 18 مقامات پر بند کرنے سے مسائل حل نہیں ہوں گے۔ انہوں نے حافظ نعیم الرحمان کو تنقید کا نشانہ بناتے ہوئے کہا کہ احتجاج ایسی جگہ کیا جائے جہاں عوام میں ہمدردی پیدا ہو۔
سعید غنی نے کہا کہ سندھ میں نئے صوبے کا مطالبہ قابل قبول نہیں، جبکہ پنجاب اور خیبر پختونخوا کی صورتحال سندھ سے مختلف ہے۔
