اسلام آباد: اڈیالہ جیل کے سپرنٹنڈنٹ نے بانی پی ٹی آئی عمران خان کی صحت، طبی معائنے اور جیل میں ملاقاتوں سے متعلق دو صفحات پر مشتمل رپورٹ سپریم کورٹ میں جمع کرا دی ہے۔ رپورٹ کے مطابق بانی پی ٹی آئی اور ان کی اہلیہ کی جیل رولز کے تحت اب تک 84 باقاعدہ ملاقاتیں ہوچکی ہیں۔
رپورٹ میں بتایا گیا ہے کہ بانی پی ٹی آئی کا روزانہ تین مرتبہ کھانے پینے کی جانچ اور طبی معائنہ کیا جاتا ہے، جبکہ متعدد سرکاری معالجین بھی ان کا طبی معائنہ کرچکے ہیں۔
اڈیالہ جیل سپرنٹنڈنٹ کے مطابق ماہرِ امراضِ چشم سے بانی پی ٹی آئی کی آنکھ کا علاج بھی کرایا جاتا رہا ہے اور ان کی ایک آنکھ تقریباً نارمل ہوچکی ہے۔ رپورٹ میں 4 نومبر 2023 سے 10 اگست 2026 تک 39 مختلف طبی ماہرین کے معائنے کی سمری بھی شامل کی گئی ہے۔
رپورٹ میں جیل ملاقاتوں کے حوالے سے مؤقف اختیار کیا گیا ہے کہ بانی پی ٹی آئی اور ان کی اہلیہ کی ہر منگل کو جیل رولز کے تحت ملاقات کرائی جاتی ہے۔ سلمان صفدر بھی رواں سال 10 فروری اور 4 اپریل کو بانی پی ٹی آئی سے ملاقات کرچکے ہیں۔
جیل سپرنٹنڈنٹ نے رپورٹ میں ملاقاتوں کے دوران عدلیہ، خارجہ پالیسی اور قانون نافذ کرنے والے اداروں کے خلاف عوامی جذبات ابھارنے کا بھی مؤقف اختیار کیا ہے، جبکہ میڈیا سے گفتگو سے متعلق عدالتی حکم کی خلاف ورزی کا حوالہ بھی دیا گیا ہے۔
اڈیالہ جیل سپرنٹنڈنٹ نے سپریم کورٹ سے مقدمہ نمٹانے کی استدعا کی ہے۔ سپریم کورٹ کا تین رکنی بینچ کیس کی سماعت کرے گا۔
