لیہ: ڈپٹی کمشنر آصف علی ڈوگر نے شہر کے مختلف عوامی، تفریحی اور کھیلوں کے مقامات کا دورہ کیا اور وہاں جاری ترقیاتی و تعمیراتی کاموں کا تفصیلی جائزہ لیا۔ڈپٹی کمشنر نے سپورٹس کمپلیکس کی مسجد، جم خانہ، بہادر لائبریری، مریم نواز سپورٹس ایرینا اور لاری اڈا کا معائنہ کیا۔ اس دوران انہوں نے مختلف مقامات پر جاری کاموں کی پیش رفت، دستیاب سہولیات اور شہریوں کو درپیش مسائل کا جائزہ لیتے ہوئے متعلقہ افسران سے بریفنگ حاصل کی۔ڈپٹی کمشنر آصف علی ڈوگر نے جم خانہ، لاری اڈا اور مریم نواز سپورٹس ایرینا سمیت دیگر مقامات پر جاری ترقیاتی کاموں کو مقررہ معیار کے مطابق تیز رفتاری سے مکمل کرنے کی ہدایت کی۔ انہوں نے کہا کہ عوامی مفاد کے منصوبوں میں غیر ضروری تاخیر کسی صورت قابل قبول نہیں، تمام متعلقہ ادارے باہمی رابطے کے ساتھ کام کی رفتار مزید تیز کریں تاکہ ترقیاتی منصوبوں کے ثمرات جلد شہریوں تک پہنچ سکیں۔ڈپٹی کمشنر نے لیڈیز پارک، سردار فضل حسین جکھڑ پارک اور فیملی پارک لیہ کا بھی دورہ کیا، جہاں انہوں نے صفائی ستھرائی، بنیادی سہولیات اور شہریوں کے لیے دستیاب تفریحی ماحول کا جائزہ لیا۔انہوں نے متعلقہ افسران کو پارکس میں صفائی اور دیگر سہولیات کا معیار بہتر رکھنے کی ہدایت کی تاکہ شہریوں اور خاندانوں کو صحت مند، محفوظ اور خوشگوار تفریحی ماحول میسر آ سکے۔
ڈپٹی کمشنر آصف علی ڈوگر نے کہا کہ کھیلوں، تفریح اور عوامی سہولیات سے متعلق منصوبے شہریوں کے معیار زندگی میں بہتری کے لیے اہم ہیں۔ جاری ترقیاتی کاموں کو جلد مکمل کرکے کھیلوں اور تفریحی مقامات کو شہریوں کے لیے مکمل طور پر فعال بنایا جائے اور عوام کو بہتر سہولیات کی فراہمی یقینی بنائی جائے۔
