لیہ: جشن آزادی کے سلسلے میں ضلعی انتظامیہ کے زیر اہتمام گزشتہ رات سپورٹس کمپلیکس لیہ میں شاندار آزادی فیملی گالا اور میوزیکل نائٹ کا انعقاد کیا گیا، جس میں ڈپٹی کمشنر آصف علی ڈوگر، ایم پی اے سمعیہ عطاء شہانی، ایڈیشنل ڈپٹی کمشنر جنرل شبیر احمد ڈوگر، ڈسٹرکٹ سپورٹس آفیسر امتیاز احمد بھٹی، سیاسی و سماجی شخصیات، ضلعی افسران، شہریوں اور میڈیا نمائندگان نے شرکت کی۔میوزیکل نائٹ میں مقامی گلوکاروں نے اپنے فن کا شاندار مظاہرہ کرکے شرکاء کو محظوظ کیا۔ خواتین، بچوں اور شہریوں کی کثیر تعداد نے تقریب میں شرکت کی اور ملی و ثقافتی رنگوں سے بھرپور پروگرام سے خوب لطف اٹھایا۔اس موقع پر شاندار آتش بازی کا مظاہرہ بھی کیا گیا، جس سے آسمان رنگ و نور میں نہا گیا۔ آتش بازی کے دلکش مناظر نے جشن آزادی کی خوشیوں کو دوبالا کر دیا۔ تقریب کی میزبانی کے فرائض مقامی صحافی زاہد واندر نے انجام دیے۔ڈپٹی کمشنر آصف علی ڈوگر نے خطاب کرتے ہوئے کہا کہ آزادی ہمارے بزرگوں کی لازوال قربانیوں اور جدوجہد کا ثمر ہے۔ ہمیں اس نعمت کی قدر کرتے ہوئے وطن کی ترقی، خوشحالی اور سلامتی کے لیے اپنا کردار ادا کرنا چاہیے۔انہوں نے کہا کہ جشن آزادی کے موقع پر لیہ کے زندہ دل شہریوں کی بھرپور شرکت اس بات کا مظہر ہے کہ اہل لیہ کے دل پاکستان کی محبت سے سرشار ہیں۔ ہمیں عہد کرنا چاہیے کہ وطن کی حفاظت، ترقی اور استحکام کے لیے اپنی ذمہ داریاں خلوص اور ایمانداری سے ادا کرتے ہوئے پاکستان کو مزید مضبوط اور خوشحال بنانے میں اپنا کردار ادا کریں گے۔
